Օրերս` աշխատանքից տուն վերադառնալիս, ալավերդցի Արտակի վրա հարձակվել են թափառող շները հարձակվել:Բարեբախտաբար նա շքամուտքին մոտ է եղել և հասցրել է փախչել` խուսափելով վնասվածքներ ստանալուց: Սակայն շան ատամների բռնելուց նոր գնած կոշիկը պատռվել է:
Ալավերդցիների խոսքով, թափառող շներ կամ կատուներ քաղաքի շքամուտքերում հաճախ են հանդիպում: Իսկ օրինակ` Սարահարթ թաղամասի 2/3 շենքի բակում բնակվում է շան մի ամբողջ ցեղախումբ: Վերջերս շունը ձագեր է ունեցել և առավել ագրեսիվ դարձել անցորդների նկատմամբ:
«Մենակ հո հարձակվե՞լը չի. սաղ օրը կլանչում են, հանգիստ չունենք, չենք հասկանում` գյուղո՞ւմ ենք ապրում, թե՞ քաղաքում: Օրը ցերեկով էլի հնարավոր է տնից դուրս գալը, բա գիշե՞րը»,-ասում է նույն շենքի բնակիչ տիկին Էմման:
Ոչ միայն բակերում, այլև քաղաքի կենտրոնական, մարդաշատ վայրերում անարգել զբոսնում են թափառող շները:
Ալավերդու բժշկական կենտրոնում անցած տարի գրանցվել է շան` մարդկանց կծելու 19 դեպք, որոնցից 14-ը` համապատասխան պատվաստում են ստացել: Սակայն բժշկական կենտրոնի փոխտնօրեն Հովիկ Ավետիսյանն ասում է, որ իրականում այդ թիվը մի քանի անգամ ավելի մեծ կարող է լինել :
«Շատերը չեն դիմում, տնային պայմաններում են բուժում շան կծած վերքերը, ինչը շատ վտանգավոր է»,-ասում է նա:
Բարեբախտաբար, Ալավերդու բժշկական կենտրոն դիմած տուժածների մոտ կատաղության դեպքեր չեն եղել: Համապատասխան պատվաստումներից ու բուժումից հետո մարդկային կորուստներ չեն գրանցվել: Արդյունավետ պայքար ծավալելու համար բժշկական կենտրոնի փոխտնօրեն Հովիկ Ավետիսյանն ասում է, որ բոլոր համապատասխան ենթակառուցվածքները պետք է աշխատեն մի նպատակի շուրջ:
Նշենք, որ Ալավերդու քաղաքապետարանը հաճախ է Ալավերդու հեռուստատեսությամբ հայտարարություններ տալիս, թե որ գիշերն է շների սպանդ կատարվելու: Գիշերվա ժամերին մի քանի կրակոցներ են լսվում, որից իրավիճակը չի փոխվում:
