Հունաստանի արտգործնախարար Դիմիտրիս Ավրամոպուլոսը շաբաթ հեռակա վեճի է բռնվել Թուրքիայի վարչապետ Ռեջեփ Թայիփ Էրդողանի հետ, որը գանգատվել էր, թե վարկանիշային գործակալությունները անարդարացիորեն բարձրացնում են Հունաստանի վարկանիշը: Այս մասին հայտնում է RIA Novosti-ն:
Ավելի վաղ Էրդողանը հեռուստահարցազրույցում ասել էր, որ վարկանիշային գործակալությունները ամբողջովին քաղաքականացված են, քանի որ բարձրացնում են Հունաստանի, ոչ թե Թուրքիայի վարկանիշը: «Նրանք միանգամից 6 աստիճանով բարձրացնում են մի երկրի վարկանիշը, որն իր կղզիներն է վաճառում»,- ասել էր Էրդողանը:
Standard & Poor’s Ratings Services միջազգային վարկանիշային գործակալությունը այս շաբաթ բարձրացրել էր Հունաստանի սուվերեն վարկանիշը՝ В- ցուցանիշից հասցնելով SD-ի (ընտրովի դեֆոլտ): Գործակալությունն այդ քայլը բացատրել էր երկրի պարտքի վերակազմավորման բարեհաջող ավարտով:
Հունաստանի վարչապետը բացատրել է, որ իրենք ոչ մի կղզի չեն վաճառում: Ավելի վաղ Հունաստանի իշխանությունները համաձայնել էին տևական ժամկետով վարձակալության հանձնել մի շարք անմարդաբնակ կղզիներ, սակայն այդ հարցով գործարքների մասին դեռևս ոչինչ չի հայտարարվել:
Նրա խոսքով՝ տնտեսական ճգնաժամերը նման են համաճարակների: «Դրանք սահման չեն ճանաչում, և երբեք չես իմանա, թե երբ կթակեն դուռը: Դրա համար պետք է հայտարարությունները հավասարակշռել»,- ասել է հույն նախարարը:
Հունաստանի ՀՆԱ-ն 2011 թվականին ընկել է 7.1 տոկոսով, միևնույն ժամանակ Թուրքիայի տնտեսությունն աճել է 8.5 տոկոսով: