«Առաջին լրատվական»-ի Realpolitik հաղորդաշարի հյուրն է ԱԺ ՀՀԿ խմբակցության պատգամավոր Սամվել Նիկոյանը:
–Բավական հետաքրքիր իրավիճակ է ստեղծվել. մենք փողոցում նորից ունենք բողոքող ժողովուրդ, Շրջանառության հարկի մասին նոր օրենքի շրջանառության դրվելու հետ զուգահեռ մենք խնդիր ունենք հասարակության մի խմբի հետ, որոնց վրա ազդում է այս օրենքը: Հանրապետականը բոյկոտեց արտահեթ նիստ հրավիրելու ընդդիմադիր պատգամավորների նախաձեռնությունը: Նախ, ինչպե՞ս եք վերաբերվում այս փաստին: Ըստ էության, ընդդիմադիրները պնդում են, որ դուք արհամարհում եք ժողովրդի խնդիրները, և ի՞նչ եք պատրաստվում անել: Արդյոք կա՞ արդեն որոշում՝ վերանայելու օրենքը հանրությանն ընդառաջ գնալու համար:
–Երբեք էլ չի նշանակում, որ եթե որևէ մեկը, որևէ քաղաքական ուժ փորձում է հարցը դնել շրջանառության մեջ, ապա դա նշանակում է, որ նա մտածում է ժողովրդի մասին, այլ մեկը, որը, ենթադրենք, չի ուզում՝ այդ խնդրի քննարկումը այդ ձևով, այդ ֆորմատով իրականացվի, նշանակում է, որ ժողովրդի մասին չի մտածում: Ովքեր հիմա դեմ են, քվեարկել են այդ նախագծի համար, քննարկման մի փուլ անցել է և օրենք է դարձել:
Ես չեմ հիշում, որ նախագծի շուրջ եղել են այսքան լայն քննարկումներ: Ի՞նչ է ասում նախագիծը՝ հարկը 3,5%-ից իջեցնում ենք 1%-ի: Ըստ էության՝ կառավարության առաջարկը, ցանկությունները շատ բարի են: Նա ասում է, որ փոքր ու միջին բիզնեսի համար, որտեղ փոքր եկամուտ է, ես ստեղծում եմ աշխատանքի շատ ավելի լավ պայմաններ՝ հարկը իջեցնում եմ: Նույնիսկ հիշում եմ, որ նախորդ կառավարության ժամանակ կար մոտեցում՝ հարկը դարձնել 0, որ 1% էլ չլինի, փաստաթղթային շրջանառությունը պետք է լիներ պարտադիր: Ըստ էության՝ այսօր ԱԺ-ում էլի մեր ընդդիմադիր գործընկերներից մեկը՝ Խաչատուր Քոքոբելյանն ասաց՝ ի՞նչ է նշանակում, որ մենք ուզում ենք օժանադակել այն պայքարին, որն ասում է՝ մեզ փաստաթուղթ պետք չէ, մենք չենք ուզում փաստաթղթով աշխատել: Մենք ուզում ենք ավելի լավ է՝ 3,5%-ով, բայց ստվերում աշխատենք:
–Ընդդիմադիրների երեկվա առաջարկը հետևյալն էր՝ այնտեղ իմպերատիվ պահանջներ դրված չէին, նրանք, ովքեր ցանկանում են փաստաթղթաշրջանառության տակ մտնել, հաշվապահներ ունենալ, այդ բեռը վերցնել՝ կարող են 1%-ից օգտվել, ովքեր չեն ուզում, կարող են մնալ 3,5%-ի տակ: Հնարավո՞ր չէր, օրինակ, այդտեղ կոնսենսուս գտնել:
–Իսկ ինչո՞ւ հնարավոր չէ։ Իհարկե հնարավոր է: Խնդիրն այն է, որ կա ներքին խոհանոց: Եթե այսօր ուշադիր լինեիք, երբ վարման կարգի վերաբերյալ խոսք էին վերցնում խմբակցության ղեկավարները և խոսում էին, հետևյալն է՝ այն, ինչ հիմա առաջարկում են ընդդիմադիրները, մի քանի օր առաջ առաջարկում էր քաղաքական մեծամասնությունը: Առաջարկում եք քննարկել այս խնդիրը՝ այո, համաձայն ենք, եկեք քննարկենք այս խնդիրը: Եթե գտնում եք, որ կան խնդիրներ, համաձայն ենք, եկեք քննարկենք: Այսինքն՝ այն, ինչ առաջարկում են, եղել է առաջարկ մեր կողմից, բայց այդ ֆորմատը չի ընդունվել: Բայց նրանք ցանկացել են արտահերթ նիստում քննարեկել: Ակնհայտ է, որ Հանրապետական չի մասնակցելու դրան, որովհետև Հանրապետականը որպես քաղաքական մեծամասնություն ինքն է օրակարգը սահմանում:
–Պարոն Նիկոյան, օրակարգը ժողովուրդն է որոշում, և Հանրապետականը, որը ընտրվել ու պատվիրակվել է ժողովրդի կողմից՝ ծառայելու Ազգային ժողովում, բարի եղեք քննարկեք, եթե կան հրատապ խնդիրներ:
–Ժողովուրդն է որոշում, ժողովրդի որոշման մեխանիզմը ասեք՝ ես հասկանամ:
–Այն ժողովուրդը, որը անձրևի տակ կանգնած է ԱԺ շենքի դիմաց, իրավունք ունի ձեր օրակարգը փոխելու:
–Դա այդպես չէ, որովհետև, ենթադրենք, 1000-2000 հոգի այնտեղ հավաքվել են, բայց կա ժողովրդի 1-2 մլն, որը այնտեղ հավաքված չէ, ասում է, որ ես ուզում եմ արժանապատիվ թոշակ ստանալ, ուզում եմ ստվերը կրճատվի:
–Դուք չգիտե՞ք, թե ովքեր են այն խոշորները, և ովքեր են թալանում պետության ունեցվածքը :
–Ես չգիտեմ։ Դուք էլ ինձ մատնացույց մի արեք, որ Դուք գիտեք, իսկ ես ոչ:
–Ես քաղաքական մեծամասնությանն եմ հարցնում:
–Ես այն պաշտոնյան չեմ, և պառլամետնում էլ չպետք է իմանան, թե որտեղ են նրանք, ովքեր են խոշոր բիզնեսը, ովքեր են ներկրում, ովքեր կարող են դա առանց փաստաթղթի անել: Այդ հարցը Դուք ինձ չէ, որ պետք է տաք: Պատգամավորը օրենսդիր մարմին է և չի կարող իմանալ, թե ինչ է այնտեղ կատարվում:
– Արդա՞ր է, որ դուք առևտրականների միջոցով փորձում եք խոշոր ձեռնարկատերերին, օլիգարխներին ստվերից դուրս բերել:
–Ոչ: Ես կարծում եմ, որ կառավարությունը ունի բավարար լծակներ՝ հարկային, մաքսային: Ես համաձայն եմ, որ պահանջը պետք է լիներ բոլորից՝ աշխատել փաստաթղթով: Այո, ստվերից դուրս եկեք: Այստեղ կա նաև այն հանգամանքը, որ խոշորը չի ուզում, որպեսզի ինքը փոքրի օգնությամբ ստվերից դուրս գա:
–Եթե դուք ընդառաջ չեք գնում ժողովրդին, մարդկանց մոտ կասկածներ են առաջանում, որ խոշորը հենց դուք եք, և խոշորը հենց նրանք են, ովքեր այս որոշումը դնելով շրջանառության մեջ՝ թաքնվում են օրենքի ետևում:
– Օրենքի նախագիծը կառավարության նախաձեռնությունն է, մենք կառավարության քաղաքական հենարանն ենք: Եթե մեր կառավարությունը գտնում է, որ ինքը պայքարում է ստվերի դեմ, և իրեն անհրաժեշտ են այս, այս լծակները, գործիքները, ապա քաղաքական մեծամասնությունը իր կառավարությանը տվել է այդ լծակները:
Հարցազրույցն ամբողջությամբ՝ տեսանյութում