Եվրամիության արտաքին հարաբերությունների գլխավոր հանձնակատարի խոսնակ Մայա Կոչիյանչիչը այսօր ներկայացրել է Եվրամիության պաշտոնական տեսակետը Հայաստանի` Ռուսաստանի ու մի քանի այլ նախկին խորհրդային հանրապետությունների հետ մաքսային միության մեջ մտնելու հնարավորության վերաբերյալ։
Քեթրին Էշթոնի խոսնակը «Ազատություն» ռադիոկայանի բրյուսելյան թղթակից Ռիկարդ Յոզվիակի հետ զրույցում փաստորեն խուսափել է ուղղակիորեն հաստատել Հայաստանում ԵՄ դեսպան Տրայան Հրիսթեայի այն հայտարարությունը, թե Հայաստանը պետք է ընտրություն կատարի ԵՄ-ի և «ԵվրԱզԷս»ի միջև։
«Իմ կարծիքով, միշտ ավելի լավ է պարզել հենց սկզբնաղբյուրի հետ։ Շատ հաճախ նման հայտարարությունները սխալ են ներկայացվում։ Մենք այժմ բանակցում ենք Ասոցացման համաձայնագրի և Խորը ու համապարփակ ազատ առևտրի պայմանագրի շուրջ։ Հայաստանը ազատ ու ինքնիշխան է ցանկացած համաձայնագրի մեջ մտնելու հարցում, այդ թվում նաև երրորդ երկրների հետ համաձայնագրի մեջ մտնելու առումով», – ասել է Մայա Կոչիյանչիչը։
Խոսնակը հավելել է, որ Հայաստանի անդամակցությունը ազատ առետրի պայմանագրին՝ երրորդ երկրների հետ չի հակասում Եվրամիության հետ խորացված ու համապարփակ ազատ առևտրի բանակցություններին։
Սակայն խնդիրը, նրա խոսքով, այստեղ վերաբերում է առավելապես մաքսային միություններին. – «Եթե Հայաստանը որոշի միանալ որևէ մաքսային միության, ապա դա անհամատեղելի կլինի Եվրամիության և Հայաստանի միջև կնքվելիք երկկողմանի Խորը և համապարփակ ազատ առևտրի պայմանագրի հետ։ Բանն այն է, որ Մաքսային միությունը ընդհանուր արտաքին առևտրական քաղաքականություն ունի և անհատ երկրները, որոնք անդամակցում են այդ մաքսային միությանը այլևս ինքնիշխան չեն իրենց արտաքին առևտրի քաղաքականության բնագավառում»:
Ինչպես հայտնել է խոսնակը, Եվրամիությունը Հայաստանի հետ համագործակցության խորհրդի նիստ է անցկացրել մի քանի օր առաջ, որի ժամանակ Հայաստանը հաստատել է իր հավատարմությունը Խորը եվ համապարփակ ազատ առևտրի շուրջ ընթացող բանակցություններին։
Այսպիսով, կարելի է եզրակացնել, որ Ռուսաստանի և ԱՊՀ մյուս երկրների հետ Մաքսային միության մեջ մտնելը հակասում է Եվրամիության հետ ընթացող բանակցությունների շրջանակում Հայաստանի հանձնառած պայմանավորվածություններին, հակասում է Եվրամիության հետ ազատ առևտրի պայմանագրին, ուստիև Եվրամիությունը զգուշացնում է Հայաստանին` մի’ մտիր Ռուսաստանի հետ մաքսային միության մեջ, մի’ անդամակցիր «ԵվրԱզԷս»-ին։
