News Georgia-ի փոխանցմամբ՝ Վրաստանի պաշտպանության նախկին նախարար Իրակլի Օկրուաշվիլին թբիլիսյան բանտում դադարեցրել է հացադուլը: Օկրուաշվիլին դեկտեմբերի 18-ին անժամկետ հացադուլ էր հայտարարել՝ որպես աջակցություն իր համակիրներին, որոնք մեղադրվում են 2011 թվականին ապօրինի զինված խմբավորում ձևավորելու մեջ:
Չնայած հացադուլի դադարեցմանը՝ Օկրուաշվիլին հայտարարել է, որ շարունակելու է պայքարել այդ անձանց և իրեն քաղբանտարկյալ ճանաչելու համար՝ այդ պլանում դիմելով նաև միջազգային կազմակերպությունների օգնությանը:
2012 թվականի նոյեմբերին խորհրդարանի մարդու իրավունքների հանձնաժողովը 180 մարդու ճանաչել էր որպես քաղբանտարկյալ, իսկ 22-ին՝ քաղաքական հալածյալ: Վերջիններիս թվում էր հայտնվել նաև Օկրուաշվիլին, սակայն ավելի ուշ նա դուրս մնաց այդ ցուցակից, երբ Վրաստանի խորհրդարանը դեկտեմբերի 5-ին հաստատեց 190 մարդուց բաղկացած ամփոփիչ ցուցակը: Վերջին պահին Օկրուաշվիլիից բացի, այդ ցուցակից հանվել էին ևս մի քանի անձինք, որոնք մեղադրվում են 2011 թվականին հակապետական գործողություններ նախապատրաստելու մեջ:
