Երևանի քաղաքապետի տեղակալ Արամ Սուքիասյանն այսօր ներկայացրեց «Էրեբունի-Երևան-2796» տոնակատարությունների ծրագիրը: Այս տարի տոնը կկրի «Երևան՝ իմ տուն» խորագիրը:
Տոնակատարությունների շրջանակում կանցկացվի «Երևան-2025» խորագրով համաժողով, որտեղ կքննարկվեն քաղաքի ապագայի վերաբերյալ տեսլականներ: Այն տեղի կունենա Հայաստանի ազգային պատկերասրահում:
Այս տարվա մշակութային ծրագրերի, ինչպես նաև համաժողովի կազմակերպման համար համայնքային բյուջեով նախատեսվել է 130 միլիոն դրամ, գովազդային ծրագրերի մասով՝ 18 միլիոն դրամ, սոցիալական ծրագրերի մասով՝ 50 միլիոն դրամ: Այսքանով տոնը չի սահմանափակվի:
Քաղաքապետի տեղակալը նշեց, որ մի քանիսին դարձյալ կտրվեն պատվավոր քաղաքացու կոչումներ: Այս տարի կլինի ուսանողական հարթակ, կանցկացվի տոնական զբոսանք՝ թատերական և կրկեսային ներկայացումներով: Կանցկացվեն նաև Երևանյան ազգային շուրջպարը, տոնական զբոսանք, սպորտային ցուցադրական ելույթներ, դասական երաժշտության համերգ, երևանյան բակային խաղերի մրցույթներ և այլն:
«Ամենապահանջկոտ հանդիսատեսի քիմքը կբավարարվի, յուրաքանչյուրը կկարողանա մասնակցություն ունենալ իր նախասիրած ոճին, ժանրին»,- ասաց Արամ Սուքիասյանը:
Տոնը կավարտվի Հանրապետության հրապարակում՝ «Երևան՝ իմ տուն» գալահամերգով: Տոնին ընդառաջ՝ հանրակրթական դպրոցներում հայտարարված է «Երևան՝ իմ տուն» շարադրության մրցույթ: Լավագույն եռյակը կպարգևատրվի քաղաքապետի կողմից:
Քաղաքապետի տեղակալը հույս հայտնեց, որ Հյուսիսային պողոտայում կավարտվեն վերանորոգման աշխատանքները, Թումանյան-Պուշկին խաչմերուկը բաց կլինի:
Նվերներ կտրվեն 2796 սոցիալապես անապահով ընտանիքների: Այս ընտանիքներին ընտրելիս հաշվի են առնվել բազմազավակության, միակողմանի կամ երկկողմանի ծնողազուրկ լինելու հանգամանքները, նվերներ կտրվեն նաև ազատամարտիկների ընտանիքներին:
Լուսանկարը՝ Armenpress-ի
