Եգիպտոսի խոշորագույն և առավել ազդեցիկ իսլամիստական կուսակցությունները հայտարարել են «ի պաշտպանություն մզկիթների և իսլամական հոգևոր ճեմարանների»` Ալեքսանդրիայում դեկտեմբերի 21-ին միացյալ լայնամասշտաբ ակցիա կազմակերպելու մասին: Դեկտեմբերի 22-ին Եգիպտոսում պետք է տեղի ունենա երկրի նոր Սահմանադրության հանրաքվեի երկրորդ փուլը` հայտնում է RIA Novosti-ն:
Քաղաքի կենտրոնում` «Ալ-Քաիդ Իբրահիմ» մզկիթի մոտ, որտեղ ապրում է մոտ 5 մլն մարդ, ցույց կկազմակերպեն «Մուսուլման եղբայրները», իսլամական պահպանողական «Սալաֆիական կոչ» շարժումը, «Ալ-Գամա ալ-Իսլամիա» խմբավորումն ու «Ալ-Ասալյա» կուսակցությունը: Նրանց համատեղ հայտարարությամբ` ակցիան կազմակերպվում է ի պատասխան մեկ շաբաթ առաջ տեղի ունեցած իրադարձությունների, երբ աշխարհիկ ընդդիմության կողմնակիցները «Ալ-Քաիդ Իբրահիմ» մզկիթում էին փակել իսլամ հոգևորական շեյխ ալ-Մահալյաուին և մինչև առավոտյան 3-ը նրան պահել էին մզկիթում: Պատճառը հավատացյալներին ուղղված իմամի կոչն էր` երկրում տեղի ունենալիք հանրաքվեի ժամանակ աջակցել նոր Սահմանադրությունը:
Ալեքսանդրիայում «Մուսուլման եղբայրներ» շարժման ներկայացուցիչ Անիս ալ-Քադին նշված ակցիան անվանել է «ազգային բողոք ավազակության և անարգանքի դեմ, որը «Ալ-Քաիդ Իբրահիմ» մզկիթի մոտ անցյալ ուրբաթ օրը կազմակերպել էին լիբերալները»: Եգիպտոսի հյուսիսային մայրաքաղաքում աշխարհիկ շարժման կոորդինատոր Ռաշիդ Աբդելալյալը համարում է, որ իսլամիստների ցույցը «երկրում քաղաքացիական պատերազմի պոռթկման նախապատրաստություն է»:
Հիշեցնենք, որ անցյալ շաբաթ անցկացվել է Սահմանադրության հանրաքվեի առաջին փուլը, որի նախնական տվյալներով` քվեարկության մասնակիցների 57%-ը կողմ է քվեարկել նոր Սահմանադրությանը, 43%-ը` դեմ:
