2011 թ. հունվարի 1-ից կենսաթոշակառուները իրենց թոշակը կարող են ստանալ ինչպես կանխիկ («Հայփոստի» և թվով 5 այլ վճարահաշվարկային կազմակերպությունների կողմից), այնպես էլ անկանխիկ (բանկերի միջոցով) եղանակով` համաձայն իրենց ներկայացրած դիմումի:
Աշխատանքի և սոցիալական հարցերի նախարարության սոցիալական ապահովության թոշակներ վճարող ստորաբաժանման աշխատակիցները, որոնք նոր կարգի մտցնելուց հետո ազատվեցին աշխատանքից, հիմնականում ընդունվեցին աշխատանքի այդ վճարահաշվարկային կազմակերպություններում:
Դրանցից երկուսը շատ կարճ ժամանակում ներկայացրին համապատասխանաբար 34 հազար և 8 հազար դիմում, ըստ որի՝ այդքան կենսաթոշակառու պատրաստ է իրենց կազմակերպությունից ստանալ թոշակը (կանխիկ): Սակայն ֆինանսների նախարարության կողմից կատարված ստուգումների արդյունքում հայտնաբերվեցին բազմաթիվ կեղծարարություններ, մասնավորապես` մահացած մարդկանց կողմից դիմումներ, ինչպես նաև դիմումներ այն մարդկանց կողմից, որոնք երկար ժամանակ դադարել էին թոշակ ստանալ կամ էլ հանրապետությունում չէին:
Արդյունքում կառավարությունը նախորդ նիստում որոշեց ժամանակավորապես կասեցնել թոշակների վճարումը վճարահաշվարկային կազմակերպությունների կողմից` մինչև ցուցակների ճշգրտումը: ՀՀ վարչապետ Տիգրան Սարգսյանն էլ շեշտեց, որ գործերն անհրաժեշտ է ուղարկել դատախազություն:
Այսօր լրագրողները աշխատանքի և սոցիալական հարցերի նախարար Արթուր Գրիգորյանից և փոխնախարար Արտեմ Ասատրյանից փորձեցին ճշտել, թե երբ կուղարկվեն այդ գործերը դատախազություն: Վերջիններս նշեցին, որ ֆինանսների նախարարության կողմից ստուգումների արդյունքները դեռևս վերջնականապես ամփոփված չեն և չեն ներկայացվել աշխատանքի և սոցիալական հարցերի նախարարություն: «Կարծում եմ, այդ գործընթացը առաջիկա մեկ շաբաթվա ընթացքում կավարտվի, և մենք այդ ժամանակ գործերը կուղարկենք դատախազություն»,- ասաց Ա. Ասատրյանը:
Հարցին, թե կոնկրետ որ վճարահաշվարկային կազմակերպությունների կողմից է նման խախտումներով ցուցակներ ու դիմումներ ներկայացվել, նախարարը և փոխնախարարը չպատասխանեցին` նշելով, որ դրանք լուրջ կազմակերպություններ են և սոցիալական ապահովության նախկին աշխատակիցների կողմից թույլ տված զեղծարարությունների արդյունքում են նման վիճակում հայտնվել: Ավելին, ըստ նախարարի՝ անուններ հրապարակելը այս պահին կարող է արատավորել վերջիններիս գործարար համբավը: