Էստոնիան չի համարվում, այսպես կոչված, «հետխորհրդային տարածք»: Ինչպես հաղորդում է ERR-ը, նման հայտարարությամբ հանդես է եկել երկրի արտգործնախարար Ուրմաս Պաետը:
Մեկնաբանելով Ռուսաստանի արտաքին քաղաքականության կոնցեպցիայի նախագծի մասին լուրերը, որը նախագահ Վլադիրմիր Պուտինի հրամանով մշակվել է ՌԴ ԱԳՆ–ի կողմից, և որի համաձայն՝ մոտակա տարիներին Ռուսաստանի արտաքին քաղաքականության առաջնային նպատակը հետխորհրդային տարածքն է, Պաետը հայտարարել է, որ «լիովին համոզված է՝ Պուտինն ի նիատի ունի Եվրամիության և ՆԱՏՕ-ի անդամ չհանդիսացող երկրներին»:
Պաետի խոսքերով` Ռուսաստանը ջանում է ակտիվ համագործակցություն հաստատել նախկին ԽՍՀՄ այնպիսի երկրների հետ, ինչպիսիք են օրինակ Բելառուսը, Ղազախստանը, և զբաղված չէ Էստոնիայի հետ կապերի զարգացմամբ:
Նա նաև նշել է, որ Էստոնիան ցանկություն չունի պատկանել «հետխորհրդային տարածքին» և միավորվել Ռուսաստանի հետ:
«Էստոնիան իր ընտրությունն արել է 20 տարի առաջ. Մենք ԵՄ–ին, ՆԱՏՕ–ին և Շենգենյան գոտուն ինտեգրված ամենաուժեղ երկրներից մեկն ենք»,- ասել է արտգործնախարարը:
