RBC-ն տեղեկացնում է, որ ԱՄՆ-ում խուճապ է առաջացել այն բանից հետո, երբ հայտնի է դարձել, որ ճապոնական վթարված «Ֆուկուսիմա 1» ատոմակայնից մթնոլորտ արտանետված ռադիոակտիվ նյութերը հասել են ԱՄՆ տարածք: Տեղի ԶԼՄ-ները քննադատության են ենթարկել ԱՄՆ իշխանություններին` «տեղեկությունը ուշացումով և խեղաթյուրմամբ տրամադրելու» համար:
Վտանգավոր նյութերը ներթափանցել են ոչ միայն ԱՄՆ արևմտյան շրջանների մթնոլորտ, այլև հասել են Կոլորադո, Վաշինգտոն, Հարավային Կարոլինա, Ֆլորիդա նահանգներ: Սակայն մասնագետները նշում են, որ դրանք վտանգավոր չեն մարդու առողջության համար:
Չնայած դրան` ԱՄն-ում կտրուկ աճել է պահանջարկը կալիումի յոդիտի նկատմամբ: Օրինակ` Չիկագոյում այդ դեղամիջոցը ամբողջությամբ սպառվել է: Դրա գինը $9-ից աճել է $35-ի: Ինտերնետ խանութներում մեկ հաբի գինը $15-ից հասել է 25-ի:
Հայտնի է նաև, որ շվեյցարական և ավստրիական Ալպերում հայտնաբերվել է յոդ-131 ռադիոակտիվ նյութի տարրեր: Սակայն դրանք չնչին են եղել:
