Սիրիայի կառավարությունը մարտի 29-ին հրաժարական կտա: Այս մասին հաղորդում է Al-Arabia հեռուստաընկերությունը: Այլ լրատվամիջոցների հաղորդմամբ` այսօր հեռուստատեսությամբ հանդես է գալու երկրի նախագահ Բաշար Ալ-Ասադը, որը նաև հայտարարելու է երկրում 1948 թվից գործող արտակարգ դրության վերացման մասին, ինչպես նաև կդադարեցվի Սահմանդրության 8-րդ հոդվածի գործողությունը, որով սահմանվում էր, որ «ԲԱԱՍ» կուսակցությունը համարվում է երկրի գլխավոր քաղաքական ուժը:
Սիրիայում այս պահին նաև քննարկվում և հաստատվելու է մի օրինագիծ, որով սահմանվելու են ահաբեկչության դեմ պայքարի նոր միջոցները, ինչպես նաև լրագրողների պաշտպանության մի շարք միջոցառումներ իրականացնելու անհրաժեշտությունը:
Այս տեղեկությունների ֆոնին հայտնի է դարձել, որ Սիրիայում կորել է երկու լրագրող: Դրանք reuters գործակալության լրագրողներ Այամ Բասմանը և Էզզաթ Բալթային են: Նրանք մարտի 26-ին հատել են Լիբանանի և Սիրիայի միջև սահմանը, ինչի մասին կարճ հաղորդագրություն են ուղարկել իրենց ղեկավարությանը, որից հետո անհետացել են: Reuters գործակալությունը դիմել է Սիրիայի իշխանություններին` աջակցելու անհետացած լրագրողներին հայտնաբերելու գործում:
Մինչդեռ Սիրիայի տարածքում շարունակվում են բախումները: Դրանք տեղի են ունեցել նաև երկրի հյուսիսասում՝ Լաթակիա քաղաքում: Մարտի 26-ին այստեղ սպանվել է 12 մարդ: Associated Press գործակալությունը հաղորդում է, որ, ըստ սիրիական իշխանությունների, երկրի հյուսիս են ներխուժել մի խումբ ահաբեկիչներ, որոնք հարձակվել են Լաթակիայի վրա` սպանելով 10 ոստիկանի: Մյուս երկու զոհերը հարձակվողներից են եղել: Ըստ նույն աղբյուրի` վիրավորվել է ավելի քան 200 մարդ:
Իրավապաշտպանների տեղեկություններով, Լաթակիայում հարձակում գործած անձինք իշխանության ներկայացուցիչներ են, որոնք նաև դիպուկահարնեի միջոցով կրակ են բացել խաղաղ ցուցարարների վրա: Նրանց գնահատականներով` այս օրերին Սիրիայում սպանվել է ավելի քան 120 մարդ, մի քանի հարյուր մարդ վիրավորվել է:
Հիշեցնենք, որ բախումները Սիրիայում սկսվել են մարտի 18-ին հարավային Դարա’ա քաղաքում, որտեղ հենց առաջին օրը սպանվել էր 8 ցուցարար:
