2012 թվականին գիտության նվաճումներում դերակատարում ունեցած մարդկանց ցուցակը, ըստ Nature ամսագրի, գլխավորում է Միջուկային հետազոտությունների եվրոպական կազմակերպության գլխավոր տնօրեն Ռոլֆ Հոյերին:
Ամսագիրը ընդգծում է Հոյերի դերը տարվա, եթե ոչ` ողջ տասնամյակի խոշորագույն գիտական բացահատումը ճիշտ ներկայացնելու գործում՝ Մեծ հադրոնային կոլայդերում Հիգսի բոզոնի հայտնաբերման մասին:
Ամսագրի հեղինակների կարծիքով՝ հենց Հոյերն է կարողացել համոզել փորձի մասնակիցներին հանրությանը ներկայացնելու տեսական Հիգսի բոզոնի պարամետրերին համապատասխանող մասնիկի հայտնաբերման մասին իրենց ունեցած տվյալները: Նա իրեն ենթարկել է «բացահայտում» բառն արտասանելու ռիսկին ու պատասխանատվությանը:
Տասնյակում է հայտնվել նաև Curiosity մարսագնացը` Կարմիր մոլորակի մակերևույթ իջեցրած մասնագետների խմբի ղեկավար Ադամ Ստելցները:
Ցուցակում տեղ է զբաղեցրել նաև Յելի համալսարանի միկրոկենսաբան Ջո Հենդելսմանը՝ «գիտական միջավայրում կանանց չգիտակցված խտրականության» հետազոտման համար: Նա իր փորձն իրականացրել է գործընկերների վրա:
Իտալացի պաշտոնյա Բեռնարդո դե Բեռնարդիսը միակ մարդն է, որը տասնյակում է ընդգրկվել ոչ գիտահետազոտական ավանդի համար: Բեռնարդիսը 6 սեյսմոլոգների հետ չկանխամտածված սպանության համար դատապարտվել է 6 տարվա ազատազրկման: Սեյսմիկ վտանգավորության մասին սխալ գնահատականի մասին գործը 2009 թվականին բուռն քննակումներ էր առաջացրել գիտական հասարակությունում:
Տարվա գիտական մարդկանց ցուցակի տասնյակում է հոլանդացի գիտնական Ռոն Ֆուշեն, որը գլխավորել է վիրուսաբանների խումբը: 2011 թվականին խումբն ստացել է թռչնագրիպի H5N1 վիրուսի հատուկ վարակիչ մոդիֆիկացիան: Այն կարող էր կաթնասունից կաթնասունի փոխանցվել:
Ցուցակում է ընդգրկվել նաև Նյու Յորքի Կլիմայի փոփոխության քաղաքային կոմիտեի համանախագահ Սինտիա Ռոզենցվեյգը, որը հայտնի է եղանակային վտանգավոր երևույթներից քաղաքը պաշտպանելու իր մշակումներով: Տարվա գիտական մարդ ճանաչվել են նաև բելգիացի կենսաբան և քաղցկեղային բջիջների հետազոտող Սեդրիկ Բլանպանը, աշխարհում գենոմների կոդավորման խոշորագույն կենտրոնի (Չինաստան) ղեկավար Յուն Վոնգը:
Nature-ը նշել է նաև բրիտանացի մաթեմատիկոս Թիմ Գոուեսին, որը հանկարծակի գլխավորել է Elsevier պարբերականի բոյկոտն ու գիտական հրապարակումների բաց հասանելիության ընդլայնման գլոբալ արշավը:
