Սեպտեմբերի 21-ին «Իսլամական պետություն» ահաբեկչական խմբավորման սպառնալիքը հասավ նաև հայ ժողովրդի համար պատմական և բացառիկ նշանակություն ունեցող Դեյր էզ Զորի Սրբոց Նահատակաց հայկական եկեղեցուն: Ահաբեկիչները նախ ականապատել, այնուհետև պայթեցրել էին եկեղեցին: Այս եկեղեցին, բացի կրոնական սրբավայր լինելուց, առանձնակի նշանակություն ունի՝ այն առումով, որ այնտեղ ամփոփված են Հայոց ցեղասպանության զոհերի, մասնավորապես՝ Դեյր էզ Զորի անապատներում զոհվածների մասունքներ և Հայոց ցեղասպանության մասին այդ ոճրագործությունը վերապրածների վավերագրեր: Եկեղեցու ականանետային հարձակման մասին իրենց մտահոգությունը հայտնեցին ինչպես ՀՀ ԱԳ նախարարը, այնպես էլ Մեծի Տանն Կիլիկիո կաթողիկոս Արամ Ա-ն, ով ոճրագործությունը որակել էր ծրագրված:
Սիրիայի Al-khabar հեռուստակայանի գործադիր տնօրեն, քաղաքական լուրերի պատասխանատու Սարգիս Քասարջյանն «Առաջին լրատվական»-ի հետ զրույցում ասաց, որ Դեյր էզ Զորի Սրբոց Նահատակաց հայկական եկեղեցին հայտնի, պատմական արժեք ունեցող եկեղեցի է, Հայոց ցեղասպանության խորհրդանիշը: Ինչպես տեղեկացրեց նա՝ եկեղեցու սրահում կան գրեր, փաստեր, նամակագրություն՝ Հայոց ցեղասպանության մասին ստույգ փաստերով:
Քասարջյանի որակմամբ՝ հստակ կարող ենք ասել, որ տեղի ունեցածը հանցագործություն էր, որը որևէ առնչություն չունի Մերձավոր Արևելքում տեղի ունեցող զարգացումների և պատերազմի, ռազմական գործողությունների հետ:
«Նման բացառիկ արժեք ունեցող հայկական եկեղեցին պայթեցնելը նշանակում է ոտնձգություն քրիստոնեության և հայության հանդեպ՝ ի նպաստ Թուրքիայի: Սա ահաբեկչություն էր՝ ի նպաստ Թուրքիայի: Վստահաբար սա գիտակցված հանցագործություն էր, որովհետև եկեղեցին շատ մեծ համբավ ունի ոչ միայն Սիրիայում, այլև ողջ աշխարհում: Եկեղեցին այդ կերպ պայթեցնելը՝ առանց շրջակայքին որևէ վնաս հասցնելու, նշանակում է, որ թիրախը հենց եկեղեցին էր և ոչ մեկ այլ բան:
Հայերն արդեն լրջորեն մտահոգված են՝ բնականաբար. երբ որևէ ահաբեկչական խմբավորում, որը հենց այդպիսին էլ ճանաչված է, գործում է այդպես, վտանգի տակ են մյուս բոլոր փոքրամասնությունները, ինչպես նաև Սիրիայի մեծամասնությունը»,- նշեց Քասարջյանը՝ հավելելով, որ վտանգված են բոլորը:
Վերջինս ասաց, որ հայերի, նաև Հայաստանի ձեռքում ոչինչ չկա: «Պարզապես այս խմբավորման վտանգը չեզոքացնելու համար պետք է աշխարհի այն պետությունները, որոնք այս արմատական խմբավորմանը ամեն կերպ սատարում են, չսատարեն, մանավանդ՝ Թուրքիան, պետք է ճնշում գործադրեն: Հայաստանը որևէ կերպ չի կարող և չպետք է միջամտի. սա միջազգային հարց է»,- ասաց սիրիական պատերազմը լուսաբանող հայ լրագրող Սարգիս Քասարջյանը:
