Վրաստանի նախագահ Միխեիլ Սաակաշվիլին հայտարարել է, թե հռետորությունն այն մասին, որ խորհրդարանը պետք է Քութայիսիից Թբիլիսի տեղափոխել, բազմաթիվ նախագծեր է կանգնեցրել: Այդ մասին նա հայտնել է Քութայիսում «Ազգային շարժման» ակտիվիստների հետ հանդիպման ժամանակ,-փոխանցում է Gruziya Online-ը:
«Քութայիսիում բազմաթիվ խնդիրներ են կուտակվել: Մենք տեղափոխվել ենք այստեղ, սակայն գործնականում շատ նախագծեր, որոնք կապված էին խորհրդարանի գործունեության հետ, չեն իրականացվել: Չիրագործված է մնացել նախագիծը, որը կապված էր Ցխալտուբո քաղաքի հետ: Այդ նախագիծը կանգնեցվել է հոկետմբերի 2-ին: Անկատար են մնացել այն նախագծերը, որոնք կապված էին հյուրանոցերի շինարարության հետ: Խորհրդարանի առջև պետք է 21-հարկանի հյուրանոց կառուցվեր, սակայն նախագիծը կանգնեցվել է:
Կանգ են առել նաև մի քանի զբոսաշրջային օբյեկտներ, կոմերցիոն զարգացումը, և այդ ամենը հռետորության պատճառով, որ խորհրդարանը չպետք է գտնվի Քութայիսում: Խորհրդարանը պե´տք է լինի Քութայիսում, Վրաստանը պետք է ապակենտրոնացվի: Դա լավ է Թբիլիսիի, Քութայիսի և ողջ Վրաստանի համար»,- հայտարարել է Սաակաշվիլին:
