Շիրակի մարզպետ Աշոտ Գիզիրյանը «Առաջին լրատվական»-ի հետ զրույցում համոզմունք հայտնեց, որ նախագահական ընտրություններում եթե անգամ առաջադրվեր «Բարգավաճ Հայաստան» կուսակցության նախագահ Գագիկ Ծառուկյանը, միևնույն է, իրենց թեկնածու Սերժ Սարգսյանը Գյումրիում կհաղթեր:
Հիշեցնենք, որ վերջին խորհրդարանական ընտրություններին, ճիշտ է, ՀՀԿ-ն Շիրակի մարզում հաղթեց, բայց Գյումրիում պարտվեց ԲՀԿ-ին: ԲՀԿ-ն Գյումրիում հաղթանակ տարավ: Կարծիքներ հնչեցին, որ ԲՀԿ-ն իր հաղթանակի համար պարտական է գյումրեցի պատգամավոր Մարտուն Գրիգորյանին, ով մեծ ազդեցություն և լծակներ ունի այդ քաղաքում: Իսկ ՀՀԿ-ն էլ պարտվեց նախկին քաղաքապետ Վարդան Ղուկասյանի պատճառով, ով ոչ միայն լավ չաշխատեց, այլև արդեն իր վարքով խանգարեց ՀՀԿ-ին: «Առաջին լրատվական»-ի հետ զրույցում դա հաստատեց նաև Ա. Գիզիրյանը՝ ասելով թե «պատասխանատու մարդիկ լավ չաշխատեցին»: Եվ ՀՀԿ-ն հենց այդ պատճառով էլ Վ. Ղուկասյանին այլևս չառաջադրեց Գյումրիի քաղաքապետի ընտրություններում, փոխարենը պաշտպանեց ԲՀԿ թեկնածու Սամվել Բալասանյանին:
Ա. Գիզիրյանը նաև ասաց, թե ինքը կցանկանար, որ Գագիկ Ծառուկյանն առաջադրվեր, և ժողովուրդը ևս մեկ անգամ տեսներ, որ ՀՀԿ-ն Գյումրիում խնդիրներ չունի: «Խորհրդարանական ընտրություններին մենք մարզում այնքան շատ ձայն տարանք, որ Գյումրիի պակասորդն ավելացրեցինք ու հաղթեցինք: Իսկ դա ասում է այն, որ եթե այս նախագահի ընտրություններին ԲՀԿ-ից առաջադրվեին, մենք էլի հաղթելու էինք միանշանակ: Ես դա ասել եմ նաև մինչև նրանց որոշումը: Հիմա կոնկրետ ԲՀԿ-ն չի առաջադրել, էլ ի՞նչ ենք խոսում»,- ասաց մարզպետը:
Ա. Գիզիրյանը նաև կարծիք հայտնեց, որ նախագահական ընտրություններին ԲՀԿ Գյումրիի կառույցը կցանկանա աշխատել իրենց թեկնածուի համար: «Պաշտոնապես աշխատելու համար չգիտեմ, նայած թե ինչ ցուցում կունենան, բայց տեղում կարծում եմ, որ քաղաքապետը կաշխատի ինչպես որ պետք է»,- ասաց նա:
Այնպես, ինչպես Հանրապետակա՞նը պաշտպանեց քաղաքապետ Ս. Բալասանյանին: «Իհարկե»,- եզրափակեց Ա. Գիզիրյանը:
