Ամերիկյան դեղագործական ընկերությունն ավարտել է սիաֆլեքս դեղորայքի փորձարկումը, որը, դեղագործների պնդմամբ, ի զորու է հաջողությամբ պայքարել ցելյուլիտի դեմ։
Փորձերին մասնակցել է 18-45 տարեկան 150 կին։ Մասնակիցների գրեթե 70%-ը «գոհ» են կամ «շատ գոհ» են սիաֆլեքսի ցածր կամ միջին չափաբաժիններով բուժման արդյունքներից։ Բժիշկները նաև փաստել են արտաքին տեսքի զգալի բարելավումը. այսպես կոչված՝ «նարնջակեղևը» նստատեղերին ու ազդրերին պակասել է։
Ցելյուլիտի առաջացման պատճառը նյութափոխանակության խանգարումն է մաշկի տակ գտնվող հյուսվածքներում։ Դրանով տառապում է սեռական հասունության հասած թույլ սեռի ներկայացուցիչների 85-98%-ը։ Մինչև հիմա ցելյուլիտի դեմ հուսալի դեղամիջոցներ չկան։
Auxilium Pharmaceuticals-ի նախագահ և գործադիր տնօրեն Ադրիան Ադամսի խոսքով՝ սիաֆլեքսը փորձարկման շրջանում հուսալի արդյունքներ է ցույց տվել։ Կլինիկական փորձարկումների երկրորդ փուլը, որից հետո դեղորայքը կներկայացվի Սննդամթերքի և դեղորայքի վերահսկողության վարչության քննարկմանը, տեղի կունենա 2015 թ. երկրորդ եռամսյակում, տեղեկացնում է depo.ua-ն։
