ԱՄՆ-ի խոշորագույն բանկերից մեկը՝ Morgan Stanley-ն, որը բորսայում Facebook-ի բաժնետոմսերի առաջին տեղաբաշխման հիմնական անդերռայթերն էր (իրավաբանական անձ, որը ղեկավարում է բաժնետոմսերի թողարկման գործընթացը), խոշոր տուգանք կվճարի Մասաչուսեթս նահանգին: Վերլուծական տվյալների տարածումը կարգավորող օրենքների խախտումը վարկային կազմակերպությանը 5 մլն դոլար կարժենա: Այս մասին հայտնում է Reuters գործակալությունը:
Նահանգի իշխանությունները հաստատում են, որ բանկիրներից մեկը խորհուրդ է տվել սոցցանցին մինչ բաժնետոմսերը բորսա դուրս բերելը ընտրողաբար բացահայտել էական ֆինանսական տեղեկություն:
Բանկը ոչ ընդունել, ոչ էլ հերքել է իր կողմից խախտում թույլ տալու մասին մեղադրանքները:
Ֆոնդային բորսայում Facebook-ի բաժնետոմսերի տեղադրումից հետո, ամերիկյան մամուլում տեղեկություններ հայտնվեցին այն մասին, որ ընկերության ներկայացուցիչները փոքր ներդրողներին շփոթեցրել են, ինչից հետո սոցցանցի դեմ վնասների փոխհատուցման պահանջներով մի քանի կոլեկտիվ հայտեր ներկայացվեցին: Իրենց հերթին սկանդալային IPO-ի կազմակերպիչ բանկերը շուրջ 100 մլն դոլար են աշխատել:
Աղբյուրի փոխանցմամբ՝ միջոցառման կազմակերպիչները իրենց հիմնական եկամուտը ստացել են բաժնետոմսերի տեղաբաշխման 38 դոլար մեկնարկային արժեքից ցածր գնով իրականացրած գործարքներից: