Արդեն երկու օր է՝ ինչ հանրապետությունում ձյուն է տեղում: Առատ ձյան հետևանքով կաթվածահար է Երևանի քաղաքային տրանսպորտը, հատկապես քաղաքի բարձրադիր հատվածներում: Երկու օրվա ընթացքում տեղացած ձյան պատճառով առաջացած մերկասառույցը դժվարացրել է երթևեկությունը: Հարց է առաջանում՝ քաղաքի կոմունալ ծառայությունները պատրա՞ստ են նման ծավալով աշխատանքների իրականացմանը:
Երևանի քաղաքապետարանի հասարակայնության հետ կապի և լրատվության բաժնից մեզ հայտնեցին, որ շուտով կտեղեկացնեն, թե ինչ ծավալով ձնամաքրման աշխատանքներ են իրականացվում քաղաքում:
«Առաջին լրատվական»-ի հետ զրույցում քաղաքում ստեղծված իրավիճակի մասին իր կարծիքը հայտնեց Հայաստանի Սպառողների միության նախագահ Արմեն Պողոսյանը: Նա նշեց, որ քաղաքում ստեղծված իրավիճակը վատ է՝ տարածված է ցեխը մայրուղիներում, մայթերում, քաղաքում խցանումներ են, անհարմարություններ, իսկ թե որտեղ են աշխատում ձնամաքրման համար նախատեսված մեքենաները՝ անհասկանալի է:
«Միշտ հայտարարվում է, որ մաքրող մեքենաները պատրաստ են ձմեռվան: Տեղումների նման առատության պայմաններում քաղաքի կոմունալ ծառայությունները պետք է աշխատեն հերթափոխով, անընդհատ: Եթե ձյուն է տեղում, անընդհատ պետք է աշխատել:
Շատ հեշտ է աղը ցանել քաղաքում, ցեխը տարածել և ձեռքերը լվալ: Աղը վնասում է և՛ բնությանը, և ասֆալտին, և՛ կոշիկներին: Սա ձնամաքրման հետամնաց ձև է: Աղը պետք է ցանել բացառիկ դեպքերում, որտեղ վթարների վտանգ կա, որտեղ մեծ թեքություն է, այդպիսի պրակտիկա վաղուց չկա քաղաքակիրթ երկրներում: Ամբողջությամբ քաղաքում աղ ցանելու անհրաժեշտություն չկա, և նպատակահարմար էլ չէ»,- տեսակետ հայտնեց Արմեն Պողոսյանը՝ շարունակելով, որ նման պայմաններում ամբողջ օրվա ընթացքում պետք է աշխատեն ձնամաքրման աշխատանքների համար նախատեսված մեքենաները:
Արմեն Պողոսյանը նկատեց, որ քաղաքում նույն դժվարություններն են առաջացել, ինչ անցյալ տարի ձյան տեղումների ժամանակ: «Խոստումները լսում ենք, իսկ քաղաքի ընդհանուր վիճակը մեզ չի բավարարում»,- հստակեցրեց նա:
Տեսանյութը՝ 2012թ. դեկտեմբերի 17-ի
