Սյունիքի մարզպետի պաշտոնում արդեն նախկին մարզպետ Սուրեն Խաչատրյանի հնարավոր նշանակումը սարսափեցնում է շատ սյունեցիների: Միայն Ագարակի և Գորիսի քաղաքապետերն են անհամբեր սպասում նախկին մարզպետի վերադարձին:
Կապանի «Կայուն զարգացում» ՀԿ նախագահ Արմեն Փարսադանյանը, «Առաջին լրատվական»-ի հետ զրույցում, անդրադառնալով Ագարակի և Գորիսի քաղաքապետերի տարածած դիրքորոշմանը, նշեց, որ տարբեր մարդիկ տարբեր կարծիք ունեն: Նա բնական է համարում նման դիրքորոշումը, քանի որ գործող քաղաքապետերը սերտ հարաբերությունների մեջ են եղել նախկին մարզպետի հետ, ինչու չէ՝ նաև Վահե Հակոբյանի հետ, ուրիշ հարց է, որ մարզի ՀԿ սեկտորը հազիվ թե ողջունի նախկին մարզպետի վերադարձի հավանականությունը, քանի որ Սուրեն Խաչատրյանի անունը մի շարք սահմռկեցուցիչ դեպքերի հետ է առնչվում:
«Ես ընդունելի չեմ համարում, որ Սուրեն Խաչատրյանը Սյունիքի մարզպետի պաշտոնը զբաղեցնի»,- ասաց նա՝ հավելելով, որ իր շրջապատում ընդունում են դա որպես խայտառակություն, և եթե Սերժ Սարգսյանը նման քայլի գնա, սա խայտառակություն կլինի պետության համար, ավելին՝ կնշանակի, որ Սերժ Սարգսյանը հասարակության դիրքորոշման վրա թքած ունի, և սա ոչ թե ապտակ կլինի հասարակությանը, այլ հարված գոտկատեղից ներքև:
Նրա խոսքով՝ ցանկացած քաղաքում տարբեր մտածելակերպ ունեցող, տարբեր դիրքեր, տարբեր հետաքրքրություններ հետապնդող մարդիկ կան, դրա համար մարզում կան նաև նրա վերադարձի հետ կապված կողմ դիրքորոշումներ. «Ես ուսուցիչներից դրական կարծիք եմ լսել, որ լավ էր վերաբերվում ուսուցիչներին, պետական բյուջեից նվիրատվություններ անում, բայց կան մարդիկ, ովքեր բացարձակ անընդունելի են համարում՝ իր քրեական անցյալի հետ կապված, տարբեր քննարկումներ են լինում մարդկանց հետ, հիմնականում թերահավատ են, որ Սերժ Սարգսյանն այս քայլին գնա, քանի որ դա կլինի հասարակությանը հարված գոտկատեղից ներքև: Ես որևէ անձնական խնդիր չունեմ Սուրեն Խաչատրյանի հետ, սա անձնական հարաբերություններից դուրս արտահայտած կարծիք է»,- ասաց Արմեն Փարսադանյանը:
«Ժառանգություն» կուսակցության Կապանի տարածքային գրասենյակի պատասխանատու Սամվել Հայրապետյանը «Առաջին լրատվական»-ի հետ զրույցում նշեց, որ քաղաքում ընդհանրապես չեն խոսում Սուրեն Խաչատրյանի հնարավոր վերադարձի մասին. «Ժողովրդի համար ի՞նչ տարբերություն, իրենց համար մեկ է, ուզում են իշխանությունը փոխվի, ՀՀԿ-ն փոխվի, սպասում ենք»,- ասաց նա: Իսկ առհասարակ, նրա դիտարկմամբ, ոչ ոք չի ցանկանա նախկին մարզպետի վերադարձը՝ բացի մերձավորներից:
«Ժողովուրդը անտարբերության մեջ է, հիասթափված է իշխանությունից, աշխատավարձ էլ չեն ստանում իշխանություններից, որ մարդավարի ապրեն, էնքան որ՝ էսօր սոված չեն, իրենց համար ուրախություն է: Հիասթափված են իշխանություններից, Սերժ Սարգսյանից են հիասթափված»,- հավելեց Սամվել Հայրապետյանը:
Կապանի «Մշակույթ և հասարակություն» ՀԿ նախագահ` Գագիկ Ղահրամանյանը նշեց՝ միանշանակ է, որ Սուրեն Խաչատրյանը իրավունք չունի մարզպետ աշխատելու, և որ սա իր անձնական կարծիքն է:
«Սուրեն Խաչատրյանի տեսակը իրավունք չունի մարզպետ աշխատելու, նա ֆերմայի վարիչի կենդանիների գծով տեղակալ կարող է աշխատել, սա իմ կարծիքն է, և նա էլ գիտի իմ կարծիքն իր մասին: Գորիսն էլ ներքին համոզմունք ունի, որ նա իրավունք չունի ճաղավանդակից այս կողմ լինելու, բայց կապանցիները միանշանակ, բացի օճառը ոչ մաքրասիրական նպատակով օգտագործողներից, դեմ են, որ ինքը Սյունիքի մարզպետ լինի»,- հավելեց Գագիկ Ղահրամանյանը:
Սյունիքում, նրա խոսքով, լուրջ չեն ընդունում Սուրեն Խաչատրյանի մարզպետ նշանակվելու հանգամանքը: Բոլորը գիտեն, թե Խաչատրյանը ինչեր է արել, և որևէ մեկը նման նշանակում չի անի:
Վահե Հակոբյանի մարզպետի պաշտոնում եղած ժամանակահատվածում էլ, նրա խոսքով, տարբերություն չզգացվեց մարզի կյանքում. «Մենք այդպես էլ չզգացինք՝ որևէ բան փոխվե՞լ է, բացի կենսագրական տվյալներից, որ նա հանցագործ չէ, շփվում էր մարդկանց հետ, բայց ըստ էության՝ ես չեմ կարծում, որ 96 թվականից մարզպետական ինստիտուտում էական փոփոխություն որևէ անձով պայմանավորված եղավ: Լիսկայի ֆոնի վրա Վահե Հակոբյանը շատ լավ ընդունվեց, ում էլ դնեին նրա ֆոնին, լավ կընդունվեր, բայց չեմ կարծում, թե այնքան բան արեց մարզի համար, որ հիմա տխրեն, որ մարզպետ չէ»,- հավելեց նա:
Ի դեպ, նրանք նշեցին, որ այս օրերին չեն տեսել ստորագրահավաք կատարվո՞ւմ է Սուրեն Խաչատրյանի համար, թե՞ ոչ:
