Երեկ կայացան «Եվրո-2012»-ի ընտրական փուլի 6 հանդիպումներ:
A խմբում Ուիթսելի դուբլի շնորհիվ բելգիացիները հյուրընկալվելիս 0:2 հաշվով առավելության հասան Ավստրիայի հավաքականի նկատմամբ և այս պահին վաստակած 7 միավորով զբաղեցնում են երկրորդ հորիզոնականը: Ավստրիացիները նույնպես ունեն 7 միավոր և երրորդ տեղում են:
C խմբում Սերբիայի ընտրանին մեծ դժվարությամբ հաղթահարեց Հյուսիսային Իռլանդիայի հավաքականի արգելքը: ՄըքԱուլեյի 40-րդ րոպեին խփած գոլին տանտերերը պատասխանեցին 65 և 74-րդ րոպեին Պանտելիչի և Տոշիչի խփած գոլերով: Նույն խմբում իտալացիները հյուրընկալվելիս նվազագույն հաշվով հաղթեցին Սլովենիային: Միակ գնդակը 73-րդ րոպեին հեղինակեց բրազիլական ծագում ունեցող Տիագո Մոտտան, ով առաջին խաղն էր անցկացնում Իտալիայի հավաքականում: Այս խմբում իտալացիները վաստակած 13 միավորով վստահորեն գլխավորում են մրցաշարային աղյուսակը: 7-ական միավորով երկրորդ և երրորդ տեղերում են սլովենացիներն ու սերբերը:
D խմբում ֆրանսիացիները մրցակցի հարկի տակ 0:2 հաշվով հեշտ հաղթանակ տարան Լյուքսեմբուրգի նկատմամբ և 12 միավորով գլխավորում են խումբը: Գոլերի հեղինակներ դարձան Մեքսեսն ու Գուրկյուֆը:
E խմբում վան դեր Վաարտը, Աֆելայը, Կայտն ու վան Պերսին ապահովեցին Հոլանդիայի ընտրանու ջախջախիչ հաղթանակը հունգարացիների նկատմամբ: Հունգարիա-Հոլանդիա` 0:4: «նարնջագույններ»-ը միակ թիմն են, որ 5 խաղերից հետո միավոր չեն կորցրել:
Մեկ հանդիպում էլ կայացավ I խմբում` Իսպանիան հյուրընկալել էր Չեխիայի հավաքականին: Աշխարհի չեմպիոններն առաջին խաղակեսից հետո զիջում էին 0:1 հաշվով, սակայն ընդմիջումից հետո Դավիդ Վիլյան երկու անպատասխան գնդակ ուղարկեց մրցակցի դարպասն ու ապահովեց իր թիմի 4-րդ հաղթանակը` 4-րդ խաղում:
