«Հրապարակ» թերթը գրում է. «Սահմանադրական բարեփոխումների գործընթացը կարծես թե շուտով քաղաքական վերադասավորումների սկիզբ կդնի: Քառյակում տարակարծություններ կան: ՀՅԴ-ն հակված է այդ բարեփոխումներին, ԲՀԿ-ն ու ՀԱԿ-ը դեմ են՝ այն համարելով իշխանության վերարտադրման գործընթաց, իսկ իրենք իշխանության գալու ծրագիր ունեն: Եվ ՀԱԿ-ԲՀԿ առաջնորդների հանդիպումից հետո Ծառուկյանն օրերս տված հարցազրույցով սահմանադրական բարեփոխումների դեմ արշավ սկսելու պաշտոնական մեկնարկը տվեց, որքան էլ ՀՀԿ-ում ասեն, թե ԲՀԿ-ն սահմանադրական բարեփոխումների մասին պաշտոնական հայտարարություն դեռ չի արել:
Սերժ Սարգսյանն էլ, ԳՄ նիստում բարեփոխումների քննարկման փուլն ավարտված համարելով, ազդարարեց լուրջ փուլ թևակոխելու մասին: «Հանրային քննարկումների արդյունքները հաշվի առնելով՝ հանձնաժողովը շուտով ավարտելու է հայեցակարգի վրա աշխատանքը և մինչև հոկտեմբերի 15-ը ներկայացնելու է իմ հաստատմանը: Արդեն իսկ պարզ է, որ հայեցակարգի ելակետը մեր քաղաքական համակարգի արմատական բարեփոխումն է, ինչը, իմ համոզմամբ, կենսական անհրաժեշտություն է մեր երկրի՝ իրավական պետականության և ժողովրդավարության ճանապարհով հետագա զարգացման համար: Ուստի մենք, որպես կառավարող կուսակցություն, պետք է առաջին հերթին լայն քննարկումներ ծավալենք մեր շարքերում, որից հետո ձեռնամուխ լինենք ակտիվ քաղաքական աշխատանքի՝ սահմանադրական բարեփոխումների գործընթացն առաջ տանելու համար… Եվ բոլոր այն, այսպես կոչված, փաստարկները, թեև, ճիշտն ասած, ես փաստարկ չեմ տեսնում, որ բերում են սահմանադրական բարեփոխումների հակառակորդները, ինձ համար անհասկանալի են: Եթե որևէ մեկը ձեզնից լսել է որևէ փաստարկ, ես կցանկանայի, որպեսզի դուք հնչեցնեիք այս դահլիճում: Միայն մի բան են ասում՝ հիմա ժամանակը չէ: Իսկ ի՞նչ է եղել, ինչո՞ւ ժամանակը չէ… դրանք ուղղակի քննարկումից խուսափելու ձևեր են և պատրվակներ»:
Ծառուկյանը հակադարձեց. «Այսինքն` Ձեր ասած հանձնաժողովի անդամները գնացել են գյուղեր` բերքահավաքի, աշխատանքների ամենախառը փուլում, երբ գյուղացին չունի սերմացու, տեխնիկա, վառելիք, կարկուտից հսկայական վնասներ է կրել, բանկերում գրավ է դրել իր տունն ու հողը, ու ասել են` սիրելի գյուղացի, դրանք բոլորը կարևոր չեն, ամենակարևորը Սահմանադրությո՞ւնն է: Թող քո երեխան ու ծնողը սոված լինեն, դեղի, հագուստի փող չունենան, բայց դրանք մի կողմ դիր, արի իրար հետ քննարկենք Սահմանադրությունը: Այդպե՞ս է եղել: Սա լուրջ չէ: Թե՞ գնացել են քննարկելու ադրբեջանական բանակի կողմից գնդակոծվող գյուղերում: Թե՞ աղետի գոտում են քննարկել, թե՞ ավտոկայաններում ու օդանավակայանում են քննարկել, որտեղից մարդիկ ընտանիքներով արտագաղթում են: Սահմանադրությունը լուրջ խնդիր է, ես ոչ մեկին խորհուրդ չեմ տա անլուրջ վերաբերվել այս հարցին: Սուտ քննարկումներ, սուտ պատկեր չի կարելի ստեղծել»: Եվ «եթե իշխանությունները որոշեն փաթեթը պատրաստել, հայեցակարգը հաստատել, այդ ժամանակ «Բարգավաճ Հայաստանը» նույնպես կքննարկի` դահլիճներում և հրապարակներում: …Այդ դեպքում ես կունենամ բարոյական իրավունք` հրավիրել ժողովրդին հանրահավաքների` մարզերում, Երևանում: Կներկայացնեմ մեր մոտեցումները, մարդկանց կլսեմ: Այն ժամանակ էլ ինչպես ժողովուրդը որոշի, այնպես էլ կանենք: Մենք կողմ ենք ցանկացած բարեփոխման, դեպի լավը փոփոխության, բայց ոչ` վերարտադրման»:
Հասկանալի է, որ ԲՀԿ-ՀԱԿ դաշինքի մարզային այցելություններն իրականում գործընթացի դեմ բացասական վերաբերմունք ձևավորելու գործընթաց են: ՀՀԿ շարքերում այս սպառնալիքին պատասխանում են՝ հիշեցնելով իրենց մեծամասնություն լինելն ու ընտրությունների ժամանակ «խփած» տոկոսները:
Մանրամասները՝ թերթի այսօրվա համարում
