Թուրքական Zaman թերթի փոխանցմամբ, վարչապետ Էրդողանը թուրք արտահանողներին հրահանգել է կտրուկ ավելացնել արտահանման ծավալները: Էրդողանի պահանջով` 2023 թվականին (Թուրքիայի Հանրապետության հիմնադրման 100-րդ տարելից) թուրքական արտահանումը կազմելու է 545.15 միլիարդ դոլար: Այսինքն` դա պետք է աճի ավելի քան 4 անգամ:
Այդ նպատակով մշակվել է հատուկ ռազմավարություն, ըստ որի` 2013 թվականին թուրքական արտահանման ծավալները կազմելու են 167.3 միլիարդ դոլար, իսկ 2018 թվականին` 293.4 միլիարդ դոլար: Դա նշանակում է, որ, դրա հետ մեկտեղ, աճելու է համաշխարհային առևտրում թուրքական արտահանման մասնաբաժինը. 2013 թվականին` 0.91 տոկոս, 2018 թվականին`1.14 տոկոս, իսկ 2023 թվականին` 1.46 տոկոս:
Նշվում է, որ երբ 2002 թվականի վերջին (նոյեմբերին) Էրդողանի գլխավորած «Արդարություն ու զարգացում» կուսակցությունը եկավ իշխանության գլուխ, թուրքական արտահանումը կազմում էր ընդամենը 36 միլիարդ դոլար: Մինչդեռ դրան հաջորդած 6 տարիների ընթացքում` 2008 թվականին, արտահանումն աճեց ավելի քան 3 անգամ` հասնելով 136 միլիարդ դոլարի:
Սակայն սկսված գլոբալ ֆինանսական ճգնաժամի պատճառով այդ ցուցանիշը որոշակի անկում ապրեց` նվազելով մինչև 114 միլիարդ դոլարի: Այժմ պլանավորված է, որ այս տարի թուրքական արտահանման ծավալը դարձյալ կգերազանցի 130 միլիարդ դոլարի սահմանագիծը:
Ներկայումս թուրք գործարարները նպատակադրվել են լայն գործունեություն ծավալել Ռուսաստանի 24, Ամերիկայի 22, Գերմանիայի 17, Չինաստանի 16, Մեծ Բրիտանիայի 16, Իրանի 16, Սիրիայի 16, Ղազախստանի 15, Լիբիայի 15, Եգիպտոսի 15, Հնդկաստանի 14, Իտալիայի 14, Ռումինիայի 14 տարբեր ոլորտներում:
Հիշեցնենք, որ ընդամենը մի քանի տարի առաջ Թուրքիայի երազանքը հանդիսանում էր արտահանման ոլորտում «100-ի ակումբում» ընդգրկվելը (դրանում ներառված են 100 միլիարդ դոլար և ավելի արտահանում ունեցող երկրները):
