«Ժառանգություն» խմբակցության ղեկավար Ռուբիկ Հակոբյանը այսօր Ազգային ժողովում տեղի ունեցած ճեպազրույցի ժամանակ հայտնեց, որ այսօր չկա սահմանադրական ճգնաժամ, կա քաղաքական ճգնաժամ, որն իշխանությունն ուզում է ուղղել դեպի սահմանադրական ճգնաժամ:
Հակոբյանը հավելեց, որ իրենք այդ թեմայով անցկացնելու են քննարկում, որի ժամանակ կհայտնեն իրենց տեսակետը. «Մենք ձևավորում ենք հարթակ, որպեսզի հնչեն յուրաքանչյուր կողմ և դեմ փաստարկները, հրավիրել ենք նաև հանձնաժողովի անդամներին, գուցե լինեն նաև ելույթներ»:
Նա անդրադարձավ նաև ԲՀԿ առաջնորդ Գագիկ Ծառուկյանի երեկվա հարցազրույցին և ասաց. «Յուրաքանչյուր լիդեր գիտի՝ ինչ ասի, ես միայն կասեմ՝ ճիշտ շեշտադրումներով հարց է, խոսքը վերաբերում է հիմնական մոտեցումներին: Ի վերջո՝ հստակ է, որ սահմանադրական փոփոխությունների անհրաժեշտությունն այսօր չկա, պետությունն իսկապես գնում է փակուղի: Քաղաքական առումով հարցազրույցի շեշտադրումներն այսօր արդիական են, այլ հարց է, թե ինչ մեխանիզմ պետք է որդեգրել, ինչպես իրականացնել, պետք է ճիշտ գործիք գտնել, որ իրականություն դառնա այդ ամենը»:
Ինչ վերաբերում է սահմանադրական բարեփոխումների հարցում քառյակի տարակարծություններին, Ռուբիկ Հակոբյանն ասաց, որ նույնիսկ Դաշնակցությունը վերջնական մոտեցում չունի, և պետք չէ ասել, թե կան տարակարծություններ:
Ծառուկյանի հարցազրույցի այն ակնարկին, թե քառյակը հնարավոր է՝ տրոհվի, նախկին դաշնակցական պատգամավորն ասաց. «Ես այդպես կատեգորիկ չեմ տեսել, հնարավոր տարբերակների մասին է խոսում: Խնդիրը հետևյալն է՝ քառյակը միշտ օրակարգային է դարձնում այն հարցերը, որոնք բոլորի կողմից ընդունվում են, և եթե որևէ հարց քառյակի մեջ տարակարծություն է առաջացնում՝ խնդիր չէ: Յուրաքանչյուր քաղաքական ուժ իր դիրքորոշումն առանձին է ընդունում: Ես կարևորում եմ, որ քառյակը միասնական տեսակետ ունենա, կարևորում եմ նաև, որ քառյակն իր աշխատանքները միասնական շարունակի»:
Լուսանկարը` PanARMENIAN Photo-ի
