Գագիկ Ծառուկյանը երբեք էլ այլընտրանք չի եղել, նա իշխանության դասակարգի մի մասն է եղել:Ընդամենը եղել են տարբեր կլանների միջև տակտիկական հակասություններ, իսկ ընդհանուր առմամբ,նա նույն քրեական դասակարգի անդամ է: «Առաջին լրատվական»-ի հետ զրույցում նման կարծիք հայտնեց անկախ փորձագետ Հայկ Բալանյանը՝ խոսելով այն մասին, թե ինչ ճակատագրի կարժանանա ԲՀԿ առաջնորդ Գագիկ Ծառուկյանը ընտրություններից հետո. կմնա՞ արդյոք այլընտրանք, կդառնա՞ ընդդմություն, թե՞այնուամենայնիվկդառնա իշխանության մի մաս:
«Զարմանում եմ, երբ նրան այլընտրանք են ասում, նա իշխանության մի մասն է:Իր քաղաքական կշիռը պայմանավորված է իր տնտեսական կշռով, ազդեցությամբ, իսկ այդ տնտեսական հնարավորությունները մեզանում պայմանավորվում են միայն իշխանություններով, իշխանությունից կախման մեջ են: Հաշվի առնելով այն ֆինանսական հոսքերը և այն ներուժը, որ իր մեջքին կանգնած է՝ անկասկած է, որ նա քաղաքական դաշտում կմնա, որովհետև նա ներկայացնում է որոշակի տնտեսական շահեր և ոչ միայն, այդ իսկ պատճառով էլ նա կմնա որպես քաղաքական ֆակտոր: Ուրիշ հարց է նա կամ ԲՀԿ-ն կլինե՞նանձամբ, անմիջականորեն իշխանության մաս, թե՞ ոչ:
Ես կարծում եմ, որ նա անուղղակիորեն, այսպես թե այնպես, իր շահերն ունի ներկայացված իշխանության մեջ, անձնապես ներկայացնելու առումով գործը չի փոխվի:Իսկ կշարունակեն այդ մարտավարությունը, թե չեն շարունակի` դա արդեն ցույց կտա Ժամանակը: Եթե նպատակահարմար գտնվի՝ այն ուժերի կողմից, որոնց ինքը ներկայացնում է, նորից վերադառնալ դեպի ակտիվ քաղաքականություն, կվերադառնա, բայց դրանից եզրակացնել, որ նա կլինի այլընտրանք այս իշխանությանը բացառվում է, որովհետև այլընտրանքը համակարգային որակի իմաստ ունի, իսկ քանի որ «Բարգավաճ Հայաստանը» համակարգային որակի իմաստ երբեք էլ չի կրել, ապա «այլընտրանք» բառն, իմ կարծիքով, ճիշտ չէ օգտագործել:
Քանի դեռ տնտեսական գործոն կա այդ ուժի ետևում՝նա, այսպես թե այնպես, իշխանության մասէ, որով պայմանավորվում է նաև նրա քաղաքական ազդեցությունը, որովհետև նրա տնտեսական իշխանությունը պայմանավորում է քաղաքականը: Նաև ԲՀԿ-ի հետ են կապված տասնյակ վարձու,այսպես կոչված,մտավորականներ, քաղաքական գործիչներ, մամուլ, կազմակերպություններ: Այդ ուժը կա,ոչնչացված չէ, և նա իր դիրքերը պահպանումէ, իհարկե` ավելի նվազ սահմաններում, բայց դեռ մնում է»:
Փորձագետը նաև կարծիք հայտնեց, որ Գագիկ Ծառուկյանը եղել է իշխանության մաս և՛ մինչև 2008 թվականը, և՛ մինչև «Բարգավաճ Հայաստան» կուսակցության ստեղծումը. «Անկախ նրանից կուսակցությունը կլինի, թե չի լինի` իր ազդեցությունն ու լծակները պայմանավորված չեն կուսակցությամբ, այդ կուսակցությունն է պարտական Գագիկ Ծառուկյանին և ոչ թե Գագիկ Ծառուկյանը կուսակցությանը»,-եզրափակեց Հ. Բալանյանը:
