Ադրբեջանական salamnews.org լրատվական կայքի փոխանցմամբ, TÜRKSAM միջազգային հարաբերությունների ու ռազմավարական հետազոտությունների կենտրոնի նախագահ Սինան Օգանն անդրադարձել է Մեծամորի ատոմակայանի արդիականացման աշխատանքներին.
«Ճապոնական «Ֆուկուսիմա 1» ատոմակայանում տեղի ունեցած վթարը հերթական անգամ ցույց տվեց, թե ինչպիսի ռիսկ է պարունակում սեյսմիկ գոտիներում ատոմակայանի կառուցումը: 1988 թվականին տեղի ունեցած Սպիտակի 8-բալանոց երկրաշարժը ցույց տվեց հենց իր` Հայաստանի համար Մեծամորի ատոմակայանի շահագործման սեյսմիկ բարձր վտանգավորությունը:
Մեծամորի ատոմակայանի սարքավորումները բավականին հնացած են, իսկ նրա ռեակտորի գործունեության ժամկետը վաղուց սպառվել է: Անթույլատրելի է, որ նույն վայրում կառուցվի դրա երկրորդ էներգաբլոկը: Դա հավասարազոր կլինի ատոմային ռումբին:
Յուրաքանչյուր պահին այդտեղ կարող է տեղի ունենալ 9 բալ ուժգնությամբ երկրաշարժ: Ժամանակակից սարքավորումներով հագեցած ճապոնական «Ֆուկուսիմա 1» ատոմակայանը չդիմացավ 8.9-բալանոց երկրաշարժին:
Մեծամորի ատոմակայանում հնարավոր վթարի արդյունքում կտուժի ոչ միայն Հայաստանը, այլև` Իրանը, Թուրքիան, Ադրբեջանը, Վրաստանը: Բացի այդ, մեծ է հավանականությունը, որ վթարի դեպքում ռադիոակտիվ ամպերը կհասնեն Ռուսաստան և անգամ Եվրոպա:
Մենք Թուրքիայում ստորագրահավաք ենք կազմակերպել` Մեծամորի ատոմակայանի փակման համար: Հնարավոր է` այդպիսի ստորագրահավաք կազմակերպենք նաև տարածաշրջանի մյուս երկրներում, ապա այդ փաստաթուղթը հանձնենք Ատոմային էներգիայի միջազգային գործակալության (ԱԷՄԳ) կամ ՄԱԿ-ի դիտարկմանը»:
Հիշեցնենք, որ ոչ վաղ անցյալում էլ Սինան Օգանը Մեծամորի ատոմակայանը որակել էր որպես «Հայկական Չեռնոբիլ»` հայտարարելով, որ այն Եվրոպայի «ամենավտանգավոր» ատոմակայանն է:
Բացի այդ, նա նշել էր, որ Սպիտակի ավերիչ երկրաշարժից մի քանի ամիս անց Մեծամորի ատոմակայանը դադարեցրել էր իր գործունեությունը, սակայն մի քանի տարի անց այն վերսկսել էր` դառնալով աշխարհի միակ փակված ու վերագործարկված ատոմակայանը:
