Այսօր Ազգային ժողովի հինգերորդ գումարման վեցերորդ նստաշրջանի առաջին օրը նիստերից բացակայում էր Հանրապետական խմբակցության պատգամավոր Սամվել Ալեքսանյանը։ Հիշեցնենք, որ անցած շաբաթ ՀՀԿ խորհրդի նիստի ժամանակ կուսակցության ղեկավար Սերժ Սարգսյանը, դիմելով իր պատգամավորներին, շեշտեց, որ նրանք պետք է երկրորդ պլան մղեն անձնական բոլոր գործերն ու մասնակցեն նիստերին: «Այսօրվանից ձեր բոլոր անձնական կամ ոչ անձնական այլ խնդիրներն ու ծրագրերը դնում եք մի կողմ, մղում երկրորդ պլան»,- դիմելով պատգամավորներին և ընդգծելով խորհրդարանում ստեղծված վիճակը՝ ասել է հանրապետության նախագահը:
Հատուկ անդրադարձ է եղել ԱԺ նիստերից բացակայող պատգամավորներին: «Այդպիսի մարդիկ ինձ համար նման են այն զինվորներին, ովքեր թողնում են խրամատը: Մեր երկրում բազմաթիվ խնդիրներ կան լուծելու, մենք հազարավոր ծրագրեր ունենք իրականացնելու, և ձեր բոլորի կռվի դաշտը և ձեր խրամատն էլ խորհրդարանն է, ձեր կռիվը` օրենսդիր աշխատանքը, ձեր թշնամին մեր ժողովրդի հոգսերն են, մեր երկրում եղած պրոբլեմներն են: Եթե զինվորը լքում է խրամատը, ապա գրոշի արժեք չունի, թե այդ ընթացքում այդ զինվորը ինչ աշխարհացունց այլ աշխատանք է կատարում: Եվ եթե զինվորը խրամատում է ու չի կրակում անհրաժեշտ պահին, այդ զինվորն էլ գրոշի արժեք չունի: Խորհրդարանականի կարևորագույն խնդիրն է՝ մասնակցել աշխատանքներին, առաջին հերթին՝ նստաշրջաններին, և քվեարկել այնպես, որպեսզի մեր ծրագրերն իրականանան»,- ասել է Սերժ Սարգսյանը:
Փաստորեն, Ս.Սարգսյանի հորդորը Ս.Ալեքսանյանին չի վերաբերում։ Նիստերից բացակայում էր նաև «Բարգավաճ Հայաստան» խմբակցության վեց պատգամավոր՝ կուսակցության ղեկավար Գագիկ Ծառուկյանի գլխավորությամբ։ Հիշեցնենք, որ անցած շաբաթ Parliamentmonitoring.am կայքի հրապարակած տվյալների համաձայն՝ ԲՀԿ-ն խորհրդարանում ամենապասիվ խմբակցությունն է։ Իսկ այսօր՝ աշնանային նստաշրջանի առաջին օրը, այդ խմբակցության վեց պատգամավորները ԱԺ չէին եկել։ Ավելին՝ նրանցից երեքի փոխարեն քվեարկում էին գոըծընկերները՝ պատգամավորներ Ռուբեն Գևորգյանը, Արայիկ Աղաբաբյանը և Տիգրան Ստեփանյանը։
Նիստից բացակայում էր նաև ՀԱԿ խմբակցության պատգամավոր Հրանտ Բագրատյանը։ Նա այս օրերին արտերկրում է՝ բուհերում դասախոսություն կարդալու նպատակով։
