Քրդական Fırat լրատվական գործակալության փոխանցմամբ, Մարմարա ծովի Իմրալը կղզում ցմահ բանտարկություն կրող քուրդ առաջնորդ, Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) հիմնադիր Աբդուլլահ Օջալանն իր փաստաբանների միջոցով իշխող «Արդարություն ու զարգացում» կուսակցությանը (ԱԶԿ) կոչ է արել զերծ մնալ քուրդ ժողովրդի դեմ սադրանքներ ու դավադրություններ նյութելուց.
«Վերջին շրջանում քուրդ ժողովրդի վրա գործած հարձակումները, քրդերի շարունակվող ձերբակալությունները, քուրդ երգիչ Թաթլըսեսի դեմ մահափորձը և պատգամավոր Սեբահաթ Թունջելի կողմից ոստիկանին հասցրած ապտակը թուրքական ոստիկանության սադրանքներն են, դավերն ու պլանը:
30 տարի շարունակ ձեր միլիոնանոց բանակով ցեղասպանության եք ենթարկում քուրդ ժողովրդին, չեք խորշում ամեն տեսակ բռնություններ գործադրելուց: Դա անբարոյականություն է: Հենց դրա համար էլ ես պարտիզանական պատերազմ ձեռնարկեցի: Դա շատ անհրաժեշտ էր, քանի որ մինչ այդ օրական 1500 մարդ էր սպանվում: Այլևս ոչ մի ուժ չի կարող կանգնեցնել քուրդ ժողովրդին»:
Հիշեցնենք, որ 1978 թվականին ստեղծված PKK-ի զինված պայքարը Թուրքիայում սկսվել է 1984 թվականին, և այժմ երկու կողմից զոհերի թիվը հասնում է մոտ 40.000-ի: Այն ժամանակ PKK-ն առավել ազդեցիկ էր և առավել մեծ հնարավորությունների էր տիրապետում: Եթե այժմ PKK զինյալները Թուրքիայի հարավարևելյան հատվածը զանգվածաբար լքելու համար կարող են օգտվել միայն Իրաքի հյուսիսային հատվածից, ապա քառորդ դար առաջ նրանք օգտվում էին նաև Սիրիայի հյուսիսարևելյան ու Իրանի հյուսիսարևմտյան հատվածներից:
