Նժդեհականությունը հզոր գաղափարախոսություն է ազգային ինքնագիտակցության բարձրացման տեսանկյունից: Այս մասին այսօր լրագրողների հետ հանդիպման ժամանակ ասաց հոգեբան Կարինե Նալչաջյանը՝ անդրադառնալով Նժդեհի գաղափարախոսությանը:
Նա նշեց, որ գոյություն ունեն ազգապահպան գաղափարներ կամ հակառակ ազդեցությամբ գաղափարներ: Ըստ նրա՝ նժդեհյան գաղափարախոսությունը ազգապահպան գաղափարախոսություն է, և լավ է, որ այդ հզոր գաղափարախոսությունը որդեգրվել է կուսակցության կողմից:
Հարցին` ի՞նչ նշանակություն ունի այն, որ հռչակվել է, թե Հանրապետական կուսակցությունը Նժդեհի գաղափարախոսության հետևորդն է, երբ բոլոր անդամները չէ, որ գաղափարախոսության կրողներն են, հոգեբանը պատասխանեց․ «Կուսակցությունը բազմաթիվ մարդկանց է համախմբում: Կուսակցությունը քաղաքական երևույթ է, նույնիսկ իդեալական դեպքում դժվար է պատկերացնել, որ Նժդեհի գաղափարախոսությունը բոլորի համար հիմք է: Նորմալ եմ համարում, որ Հանրապետական կուսակցության բոլոր անդամները նժդեհական գաղափարախոսության կրողները չեն: Իսկ կուսակցության կորիզում կան շատ հայրենասեր մարդիկ»:
Անդրադառնալով քաղաքականությանը՝ նա ասաց, որ առաջին խնդիրն այն է, որ այլընտրանք չկա նախագահական ընտրություններում: Հարցին, թե անհատականությունների պակա՞սն է նման իրավիճակ ձևավորել, ասաց, որ անհատականություններ կան, այլ խնդիր է, թե նրանք ինչ հնարավորություն ունեն առաջնորդ դառնալու, պարզապես գնահատել է պետք: «Չեն գնահատվում այն մարդիկ, ովքեր իսկապես նվաճումներ ունեն ամենատարբեր ասպարեզներում, ունեն շատ լուրջ հնարավորություններ իրենց լուման ներդնելու: Մերիտոկրատիայի հարցը ես առաջինն եմ եղել, որ բարձրացրել եմ, ուղղակի պետք է տեսնել և չխանգարել»,- ասաց Կարինե Նալչաջյանը՝ շարունակելով, որ պայծառ անհատականություններին համակարգը դուրս է մղում: Նրա համոզմամբ՝ պետք է ճանապարհ հարթել նման մարդկանց համար, լծակներ ունեցող մարդիկ պետք է ունենան ազգային գաղափար, համընդհանուր «մենք»-ի զգացողություն:
