Այսօր, մի քանի ժամ առաջ ուժգին փոթորիկ է եղել Արևելյան Վրաստանի Կախեթի տարածաշրջանում: Ինչպես հաղորդում է Новости-Грузия-ն, փոթորիկը Դեդոպլիսցկարո շրջանում պոկել է տների տանիքները, կոտրել ապակիները, արմատախիլ արել ծառերը:
Հիշյալ շրջանի տեղական վարչակազմի`սաքրեբուլոյի ղեկավար Լևան Բագաշվիլին գործակալությանը հաղորդել է, որ փոթորկի արդյունքում վնասվել են էլեկտրահաղորդման գծերը, ինչի պատճառով շրջանի մի մասը մնացել է առանց էլեկտրաէներգիայի: Ներկայումս քամին հանդարտվել է, և տեղական իշխանությունները միջոցներ են ձեռնարկում փոթորկի հետևանքները վերացնելու ուղղությամբ:
