«Համազգային վստահություն» խորհուրդը՝ մի շարք հասարակական կազմակերպությունների ներկայացուցիչների և ԵԿՄ անդամների հետ այսօր այցելել է Հյուսիսային հատվածում գտնվող զորամասերից մեկը: Խորհուրդը զորամասի հրամանատար Վահագն Ասատրյանին շնորհեց «Համազգային վստահությունը՝ հայոց բանակին» մրցանակը, որը խորհրդանշում է ժողովրդի վստահությունը հայոց բանակի նկատմամբ:
Մրցանակը հանձնելու միջոցառումն ուղեկցվել է նաև համերգային ծրագրով: Կատարումներով հանդես են եկել «Հայաստանի ձայնը» նախագծի երկրորդ եթերաշրջանի մասնակիցներ՝ Նարե Գրիգորյանը, Վիգեն Ահարոնյանը, Արմեն Հովհաննիսյանը, Անահիտ Պետրոսյանը, X ֆակտոր նախագծի երրորդ եթերաշրջանի մասնակից Նարեկ Խաչատրյանը և զորամասի ծառայող Աղասի Մնացականյանը:
«Առաջին լրատվական»-ի հետ զրույցում զորամաս այցելած սոցիոլոգ Ահարոն Ադիբեկյանն ասաց, որ պետության գործունակության-հաջողության և անգործունակության-անհաջողության միջազգային վարկանիշ կա, որը չափվում է 11, 12 չափորոշիչներով՝ դրանցից ամենակարևորը սահմանների պաշտպանությունն է և ներքին անվտանգությունը:
«Միջազգային կառույցների գնահատմամբ՝ Հայաստանը ամենահաջողված, կայացած երկիրն է, զիջում է, որոշ ցուցանիշներով միայն Ղազախստանին, Վրաստանը 55-րդն է, Ադրբեջանը՝ 66-րդը, Ռուսաստանը՝ 80-րդը, Հայաստանը՝ 101-րդը, Ղազախստանը՝ 106-րդը: Ակնհայտ է, որ մեր բանակի շնորհիվ է պետությունը համարվում գործունակ, հաջողված»:
Բացի դրանից՝ բոլոր հարցումներում ամենավստահելի կառույցը մեր երկրում բանակն է: Վերջին հարցման արդյունքներում, որին մասնակցել է 4400 բնակիչ 95 համայնքներից, ՊՆ-ի նկատմամբ դժգոհություն է ներկայացրել ընդամենը 1 տոկոսը: Հասարակությունը վստահում է զինվորների մարտական պատրաստվածությանը և հստակ գիտի, որ մեր սահմաններն անառիկ են:
Առավել մանրամասն ավելի ուշ ՝ տեսանյութում:
