Թուրքական Miliyet թերթի հաղորդմամբ, Թուրքիայի արտգործնախարարության խոսնակը մեկնաբանել է ԱՄԷ-ի տարածքով Թուրքիայից դեպի Եմեն առաքված մեծաքանակ զենքի հայտնաբերման ու առգրավման հանգամանքը.
«Միջազգային լրատվամիջոցները տեղեկատվություն են տարածել այն մասին, որ թուրքական նավահանգստից դուրս եկած նավը դեպի ԱՄԷ իր ճանապարհին որոշակի դադար է տվել եգիպտական նավահանգիստներից մեկում, ինչից հետո մեկնել է ԱՄԷ, որտեղ էլ տեղի ոստիկանությունը դրանում հայտնաբերել է 16.000 ատրճանակ:
Բնականաբար, զենքի այդ առաքումն իրականացվել է ապօրինի ճանապարհով: Իրականությանը չեն համապատասխանում այն լուրերը, թե պաշտոնապես արտոնվել է զենքի այդ խմբաքանակի առաքումը դեպի Եմեն: Մենք մեր հետաքննությունն ենք ձեռնարկել այս կապակցությամբ:
Մեր երկիրը չի զբաղվում զենքի առաքմամբ դեպի այն երկրներ, որոնցում առկա է հակամարտություն, կամ հակամարտության առաջացման ռիսկ գոյություն ունի, քանի որ դա կարող է անկայունություն առաջացնել այդ երկրներում կամ էլ ավելի սրել իրավիճակը:
Բացի այդ, միջազգային պայմանագրի համաձայն, Թուրքիայից զենքի արտահանման գործընթացը կրում է թափանցիկ բնույթ»:
Հիշեցնենք, որ վերջին շրջանում սա արդեն երկրորդ դեպքն է, երբ թուրքական նավահանգիստներից մեկնարկած նավում զենք է հայտնաբերվում: Սրանից առաջ էլ մարտի 15-ին իսրայելական ռազմածովային ուժերը Միջերկրական ծովում կալանել էին «Վիկտորիա» բեռնանավը, որը մեկնարկել էր Թուրքիայի միջերկրածովյան Մերսին նավահանգստից և զենք էր փոխադրում դեպի Եգիպտոս: Այնտեղից էլ այդ զենքը հասցվելու էր Գազայի հատված, որը ծովային շրջափակման է ենթարկված Իսրայելի կողմից:
