ԱՄՆ նախագահ Բարաք Օբամայի արտաքին քաղաքականությանը սպառնում է եռագլուխ «հրեշ»՝ «Իսլամական պետությունը», Չինաստանը և Ռուսաստանը՝ գրում է The New York Times-ը:
Պարբերականը նշում է, որ ԱՄՆ ղեկավարին մարտահրավեր են նետել Իրաքում և Սիրիայում «Իսլամական պետություն» խմբավորումը (առաջնորդ՝ Աբու Բաքր Ալ-Բաղդադի), Սի Ցզինպինի գլխավորությամբ բարձրացող Չինաստանը և Վլադիմիր Պուտինի հավակնոտ Ռուսաստանը:
Առաջին դեպքում Օբաման պետք է ահաբեկչական խմբավորման նոր տեսակին դիմակայելու միջոց գտնի, որը պատրաստ է կիրառել ամենադաժան մեթոդները՝ ասվում է հոդվածում: Ներկայում «Իսլամական պետությունն» ավելի քան 10 հազար զինյալ ունի՝ ավելացնում է պարբերականը:
Ըստ թերթի՝ Ռուսաստանի դեպքում Օբաման բախվել է «թուլացող» տերության, որում կրճատվում է բնակչության թիվը և թագավորում է ազգայնականությունը, և որի տնտեսությունը խոցելի է: Վաշինգտոնը խաղադրույք է անում այն բանի վրա, որ ժամանակի ընթացքում Մոսկվայի նկատմամբ սահմանված պատժամիջոցները կանդրադառնան Պուտինի վարկանիշի վրա, սակայն մոտ ապագայում իրավիճակն ավելի բարդ է՝ ասվում է հոդվածում:
Ինչ վերաբերում է Չինաստանին՝ այստեղ խոսքն աճող ռեսուրսներով բարձրացող տերության մասին է, որի կարծիքով՝ ժամանակն է, որ Պեկինը վերադարձնի ազդեցությունն Ասիայում: Ըստ թերթի՝ Ճապոնիայի, Հարավային Կորեայի, Վիետնամի և Ֆիլիպինների նկատմամբ տարածքային հարցերում Չինաստանի ներկայիս նախագահ Սի Ցզինպինի ագրեսիվ տրամադրվածությունն Օբամայի համար անակնկալ է եղել:
