Եթե ՀՀ քաղաքական դաշտում գործող բոլոր ուժերը գալիք նախագահական ընտրություններին ընդառաջ` հայտարարեն ընտրություններին չմասնակցելու մասին, որևէ բան չի փոխվի: Այսօր լրագրողների հետ հանդիպմանը այս մասին ասաց ԱԻՄ առաջնորդ Պարույր Հայրիկյանը՝ խոսելով ներքաղաքական զարգացումների մասին:
Անդրադառնալով երկու օր առաջ տարածված ԲՀԿ հայտարարությանը՝ Հայրիկյանն ասաց, որ խորհրդարանական երկրորդ ուժի` նախագահական ընտրություններին չմասնակցելը չի կարելի համարել բնականոն: Թե ինչու ԲՀԿ-ն նման քայլ արեց` Պարույր Հայրիկյանը դժվարացավ ասել: Նա միայն մեկ տարբերակի մասին խոսեց.
«Միգուցե Բրյուսելում եվրոպացիների հետ շփվելով` հասկացավ, որ գործարարների մասնակցությունը քաղաքականությանը արգելված է, գուցե սա էր որոշման պատճառը` չեմ կարող ասել: Կարծում եմ, որ դա այս պահի որոշում էր: Այս պահի համար է տրված հայտարարությունը, և այն հազիվ թե կաշկանդի նրանց առաջիկա երկու ամիսների ընթացքում այլ դիրքորոշում հայտնել: Եթե կուսակցությունը չի մասնակցում ընտրություններին, վնասում է իրեն և լրջորեն է վնասում. դա նշանակում է, որ իր գոյությունն անիմաստ է»:
Բանախոսը նկատեց, որ նոր կուսակցությունները պետք է զգույշ լինեն իրենց դրսևորումներում, եթե ցանկանում են քաղաքականության մեջ մնալ:
Հիշելով ԲՀԿ առաջնորդ Գագիկ Ծառուկյանի և նրա մայրիկի՝ Ռոզա Ծառուկյանի հետ իր խոսակցությունները՝ ԱԻՄ առաջնորդն ասաց, որ նրանք ընդունել են իր ծրագրերը: Ուստի ենթադրեց, որ վերջիններս կքվեարկեն իր օգտին:
