Քրդական Fırat լրատվական գործակալության հաղորդմամբ, Թուրքիայի Ազգային հետախուզական կազմակերպությունում (MIT) իրագործվել է «մաքրման» գործողություն, որն իրականացրել է MIT-ի 16-րդ ղեկավար Հաքան Ֆիդանը:
Նշվում է, որ Ֆիդանը ցանկանում է լիկվիդացնել MIT-ը, ավելի ճիշտ` երկար ժամանակ հակաիսլամական ամրոց հանդիսացած MIT-ը այսուհետ առավել բարյացակամ տրամադրված կլինի Էրդողանի կառավարության հանդեպ: Բանակի ազդեցության սահմանափակման նկատմամբ իրականացրած հաջող գործողություններից հետո Էրդողանն այժմ ցանկանում է վերահսկողություն հաստատել MIT-ի վրա, և դա հանձնարարել է MIT-ի ղեկավար Հաքան Ֆիդանին:
Հիշեցնենք, որ Թուրքիայում առաջին հետախուզական կազմակերպությունն ստեղծվել է դեռևս Օսմանյան կայսրության վերջին տարիներին: Դա 1913 թվականի նոյեմբերի 17-ին հայ ժողովրդի դահիճներից մեկի` Էնվեր փաշայի հիմնադրած չարաբաստիկ Teşkilat-ı Mahsusa-ն է (թարգմանաբար` հատուկ կազմակերպություն):
Վերջինս երկրի ներսում և երկրից դուրս պիտի իրականացներ հետախուզական և հակահետախուզական աշխատանքներ, ինչպես նաև հակաքարոզչության միջոցով չեզոքացներ կայսրության մեջ մտնող Մերձավոր Արևելքի վրա օտար երկրների ազդեցությունը, հետագայում՝ նաև աջակցեր ռազմաճակատներում մարտնչող թուրքական զորքերին:
Չնայած իր վերոնշյալ պարտականություններին` Teşkilat-ı Mahsusa-ն չխորշեց 1915 թվականին հայ ժողովրդի ոչնչացման գործընթացում ակտիվորեն ներգրավվելուց:
Ինչ վերաբերում է Էրդողանի կողմից հենց այժմ MIT-ի նկատմամբ վերահսկողություն հաստատելուն, ապա պետք է նշել, որ դա լիովին սպասելի և տրամաբանական քայլ է: Պետք է հիշել, որ MIT-ի փոխտնօրեն աշխատած ժամանակ Ֆիդանը հանդիսացել է նաև արտաքին քաղաքականության գծով Էրդողանի խորհրդականը և համարվում է Էրդողանի վստահելի մարդկանցից մեկը:
Ի դեպ, երբ 2010 թվականի մայիսի 27-ին Կենտրոնական Ասիայի և Մերձավոր Արևելքի գծով մասնագետ Հաքան Ֆիդանը նշանակվեց MIT-ի նախագահ, դա հարուցեց Իսրայելի խոր զայրույթը: Իսրայելի 22-րդ պաշտպանության նախարար Էհուդ Բարաքը հայտարարեց, որ «Իրանի ակնհայտ բարեկամի» նշանակումը MIT-ի նախագահի պաշտոնում նշանակում է, որ Իրանը կարող է գաղտնի տեղեկատվության մեջ ներթափանցելու թույլտվություն ստանալ:
Բարաքի կարծիքով, հենց Ֆիդանն էր հանդիսանում մայիսի 17-ին Թեհրանում Թուրքիայի, Բրազիլիայի և Իրանի միջև կնքված եռակողմ համաձայնության հեղինակը, որը պետք է կանխեր ՄԱԿ ԱԽ-ի կողմից Իրանի նկատմամբ նոր պատժամիջոցների սահմանումը, և ըստ որի` իրանական կողմը ցածր հարստացված ուրանը պետք է ուղարկեր արտերկիր, իսկ այնտեղից ստանար բարձր հարստացված ուրան` բժշկական նպատակներով օգտագործելու համար:
