Հրաչյա Աճառյանի անվան թիվ 72 դպրոցի տեղում կառուցվող ՀԱՊԿ ակադեմիայի շինարարական աշխատանքները ակտիվացան հատկապես ՕԵԿ-ի ընդդիմադիր դառնալուց հետո, երբ Արթուր Բաղդասարյանը նշանակվեց ակադեմիայի նախագահ: Այդ օրերին քանդվեց անգամ դպրոցի պատմամշակութային նշանակության առաջնապատը, ինչը որակվեց որպես պատահական փլուզում, ապա ամբողջ շինհրապարակը պատվեց «ՀԱՊԿ ակադեմիա» գրությամբ շինարարական պաստառներով, և ակտիվ շինաշխատանքներ սկսվեցին: Բայց ինչ թափով որ այդ աշխատանքները սկսվել էին, նույն թափով էլ կանգ առան: Այս օրերին բացարձակապես որևէ աշխատանք չի կատարվում: Մինչդեռ ամիսներ առաջ՝ փետրվարի 5-ին, այն ժամանակ դեռևս Ազգային անվտանգության խորհրդի քարտուղար Արթուր Բաղդասարյանը և Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան Երևանում քննարկել էին Հայաստանում ՀԱՊԿ ակադեմիայի ստեղծմանն առնչվող կազմակերպչական և բովանդակային հարցերը և արձանագրել, որ ակադեմիայի գործունեության մեկնարկը պետք է տրվի սեպտեմբեր ամսին:
Ակադեմիան նախատեսված է ՀԱՊԿ և դրանից դուրս երկրներում մասնագետներ պատրաստելու համար: Ըստ Բորդյուժայի՝ դա պետք է լիներ խոշոր տարածաշրջանային կենտրոն, որում պետք է կրթվեին ապագա քաղաքագետներ, մշակվեին ավտանգության բնագավառի հարցերի լուծումների վերաբերյալ առաջարկներ, ինչպես նաև քարոզվեին ՀԱՊԿ նպատակներն ու խնդիրները:
Որոշ տեղեկություններով, սակայն, Ակադեմիայի կառուցման աշխատանքների դադարեցումը պայմանավորված է ֆինանսական խնդիրներով: ՕԵԿ առաջնորդ Արթուր Բաղդասարյանը չի պատրաստվում իր վրա վերցնել ակադեմիայի կառուցման ամբողջական ծախսը, ինչն, ըստ էության, բավական մեծ գումարների հետ է կապված: Իսկ դրսից հատկացվող ֆինանսական օգնությունը կարծես թե ուշանում է, ինչը մեկնաբանվում է որպես մտադրությունների փոփոխություն: Անվտանգության խորհրդի քարտուղար չլինելով՝ Բաղդասարյանը չունի այլևս այն ուժը, ինչ առաջ, հակառակ այն բանի, որ Բաղդասարյան- Բորդյուժա մտերմությունը պայմանավորված չէր այդ պաշտոնով: Նրանց մտերմությունը անձնական է:
Ինչևէ, չկառուցված ակադեմիայի ռեկտոր Անդրանիկ Ավետիսյանը, որից մասնավորապես ուզում էինք պարզել, թե ինչո՞ւ է ուշանում իր ղեկավարած կառույցի շինարարությունը, ի՞նչ և ո՞ւմ միջոցներով է կառուցվելու, և առհասարակ, ինչո՞վ է ինքը զբաղված, երբ դեռ այդ կառույցը չկա, այս անգամ էլ չցանկացավ մեզ հետ խոսել: