Թուրքական Bugün թերթի փոխանցմամբ՝ Թուրքիայի պաշտպանության նախարար Իսմեթ Յըլմազը հայտարարել է, որ վերջին 8 տարում պաշտպանական արդյունաբերության արտադրանքի արտահանումն աճել է 4 անգամ՝ հասնելով 1 միլիարդ դոլարի:
Ընդգծելով, որ Թուրքիայի պաշտպանական արդյունաբերության սեկտորն աճում է օրեցօր՝ Յըլմազը հայտարարել է, որ իրենք նպատակադրվել են մինչև 2023 թվականը (Թուրքիայի Հանրապետության հիմնադրման 100-ամյակ) արտահանման այդ ցուցանիշը հասցնել 25 միլիարդ դոլարի:
Յըլմազը մանրամասնել է, որ 2023 թվականին Թուրքիայի ընդհանուր արտահանումը հասնելու է 500 միլիարդ դոլարի, որի 5 տոկոսը (25 միլիարդ դոլար) բաժին է ընկնելու պաշտպանական արդյունաբերության ոլորտին: Ըստ Յըլմազի՝ թուրքական ռազմական արտադրանքով հետաքրքրված են Պարսից ծոցի երկրները.
«Թուրքիան պետք է հասնի այնպիսի մակարդակի, որ կարողանա ռազմական արտադրանքի արտահանման ոլորտում մրցակցել ԱՄՆ-ի, Ռուսաստանի ու Չինաստանի հետ: Դրա համար անհրաժեշտ է մշակել ռազմական արտադրանքի արտադրության զարգացման ծրագիր: Ներկայումս Թուրքիան իր ռազմական կարիքների 50 տոկոսն ապահովում է ներքին արտադրության հաշվին»:
