Մերգելյանի ինստիտուտին հարող այգուն կից տեղակայված գյուղատնտեսական մթերքների տոնավաճառում երևանցիները «Առաջին լրատվական»-ի հետ զրույցում ընդգծեցին, որ գյուղմթերքի գներն էժան չեն, բայց դա գյուղացու մեղքը չէ, այլ իշխանությունների, որոնց գործունեության հետևանքով այսօր գյուղացին վարկեր ունի, ջուր չունի, դաշտերում մթերքը չորանում է, ուստի եթե մթերքը քիչ է, գներն էլ մատչելի լինել չեն կարող: Նրանք ասացին, որ այսօր գյուղացին հողից արդեն երես է թեքում. շատ անմշակ հողեր ունենք:
Երևանցի գնորդներից մեկն անգամ շուկայում բարձրաձայն ասաց, որ գռփող իշխանությունները վիշապի պես կտրել են գյուղացիների ջուրը: Ըստ նրա՝ անհրաժեշտ է, որպեսզի կառավարությունը այսօր օգնի գյուղացուն, որ գյուղացին ստիպված չլինի, իր բերքը թանկ վաճառել, որի արդյունքում էլ գնորդներ չի ունենում, և ապրանքը չորանում է:
Գյուղացիները «Առաջին լրատվական»-ի հետ զրույցում նշեցին, որ գրեթե բոլոր գյուղերում ոռոգման ջուրը, հարկերը մեծ խնդիր են, դաշտերում իրենց ապրանքը մնում է, փչանում, եղած ապրանքն էլ նորմալ իրացնել չեն կարողանում, եթե Ռուսաստան տանողներ չլինեն մեծաքանակ առևտուր չի լինի:
Գյուղացիները նաև ընդգծեցին, որ լավ կլիներ շուկայի տարածքը մեծ լիներ:
Առավել մանրամասն՝ տեսանյութում:
