Yota-ն պայքար է մղում սմարթֆոնների շուկայի համար: Ինտերնետ կապի օպերատորը, որի 4.5 տոկոսը վերահսկում է «Ռոստեխնոլոգի» պետական կորպորացիան, երկու դիսփլեյով սարք է ստեղծում: Դրանցից մեկը կլինի դասական LCD, իսկ երկորդը` «էլեկտրոնային թղթի» տեխնոլոգիայով, որը սովորաբար կիրառում են էլեկտրոնային գրքեր մշակողները: Այս մասին հայտնում է Vesti-ն:
Երկու դիսփլեյների համադրությունը մի կողմից` թույլ կտա մեկ կորպուսում միավորել ընթերցարանն ու սմարթֆոնը, մյուս կողմից՝ թույլ կտա էներգիա խնայել, քանի որ «էլեկտրոնային թուղթը» ավելի քիչ է էլեկտրականություն պահանջում, քան LCD-ն:
Ընկերության գլխավոր տնօրեն Վլադիսլավ Մարտինովի խոսքով՝ սարքի ստեղծման վրա աշխատել է 35 ինժեներ, իսկ նախագծի բյուջեն կազմել է 25 մլն դոլար: Սմարթֆոնը կներկայացվի փետրվարին՝ Mobile World Congress-ում, որը տեղի կունենա Բարսելոնում:
Սարքը վաճառքի դուրս կբերվի 2013-ի երրորդ եռամսյակում: Այն կաշխատի Google Android օպերացիոն համակարգով և կարժենա 500 դոլար: