Apple ընկերությունը ուղղումներ է կատարել իր նավիգացիոն հավելվածում՝ ավստրալական Միլդյուրա քաղաքի ոստիկանության կողմից ճանապարհների անճշտության վերաբերյալ հայտարարությունից հետո: Այս մասին հայտնում է The Guardian-ը:
30 հազար բնակիչ ունեցող քաղաքը գտնվում է Ավստրալիայի խոշորագույն ազգային պարկերից մեկից ոչ հեռու: Apple-ի քարտեզների անճշտության պատճառով ճանապարհորդները, քաղաք հասնելու փոխարեն, հայտնվում են խիտ անտառում:
Քարտեզագիրների սխալը կարող է ճակատագրական լինել ճանապարհորդների համար, որոնք կարող են կորչել անծայրածիր անտառում, որտեղ ջերմաստիճանը երբեմն հասնում է 46-ի՝ նախազգուշացրել է ոստիկանությունը: Վերջին շրջանում այնտեղ 4 մարդ է մոլորվել, որոնցից մեկը մի քանի օր շարունակ չի կարողացել գտնել ճանապարհը:
Apple ընկերությունն ավելի վաղ պաշտոնապես ներողություն էր խնդրել iOS 6 բջջային օպերացիոն համակարգի հավելվածում տեղ գտած սխալների համար: Նշենք, որ նոր սմարթֆոններում ընկերությունը ներդրել էր սեփական քարտեզները՝ Google Maps-ի փոխարեն: