2011 թ. մարտի 20-ին Արմավիրի քաղաքապետի ընտրությունները ուղեկցվեցին տարաբնույթ ընտրախախտումներով: Օրը ցերեկով բացահայտ ընտրակաշառք էր բաժանվում, տեղամասային հանձնաժողովների անգործությամբ և թողտվությամբ մեկ անձը մի քանի անգամ քվեարկում էր հանրապետությունից բացակա անձանց փոխարեն, Կենտրոնական ընտրական հանձնաժողովի նախագահ Գարիկ Ազարյանի ցուցումով արգելվում էր տեղամասերում նկարահանել քվեարկության ընթացքը, ոստիկանները կարգ ու կանոն էին պահպանում ցուցումների ազդեցության տակ և ակնհայտորեն միակողմանի: Ընտրական մթնոլորտը գնալով շիկանում էր:
Քաղաքապետի թեկնածու Սևակ Մինասյանի նախընտրական շտաբը պարբերաբար տեղեկատվություն էր ստանում կեղծիքների և դերակատարություն ունեցող անձանց վերաբերյալ: Նշենք, որ Սևակ Մինասյանը ընտրություններում գործող քաղաքապետ Ռուբեն Խլղաթյանի հիմնական մրցակիցն էր:
Ոստիկանության միակողմանի դիրքորոշումից և ընտրակեղծիքների նկատմամբ աչք փակելուց վրդովված Սևակ Մինասյանի նախընտրական շտաբը որոշեց սեփական ուժերով պայքարել ընտրակեղծիքների դեմ:
Ժամը 15-ի մոտակայքում ընտրակաշառք բաժանող Տիգրան Ավետիսյանին մոտեցան Սևակ Մինասյանի վստահված անձիք և ձեռքից խլեցին ցուցակներն ու դրամը: Վերջինիս հայտնեցին, որ խլվածը կարող է ստանալ Սևակ Մինասյանի նախընտրական շտաբից: Տիգրանը իր մեքենայով եկավ նախընտրական շտաբ տեսախցիկի ներքո բացատրություն գրեց, թե ինչով է զբաղվել և ում ցուցումով: Արմավիրի ոստիկանությանը տեղեկացվեց պատահածի մասին:
Ոստիկանները գիտակցում էին, որ երևույթի վերաբերյալ լուրը արագ կտարածվի Արմավիրում և ընտրակեղծիքի դերակատարները կարող են կաշկանդվել իրենց գործողություններում: Առանց երկար մտածելու առևանգման մեղադրանքով Արմավիրի ոստիկանություն բերման ենթարկեցին Սևակ Մինասյանի վստահված անձ Անուշավան Ալեքսանյանին, իսկ Տիգրան Ավետիսյանին՝ որպես տուժողի, բաց թողեցին, որ իր կիսատ գործը հասցնի ավարտին: Ոստիկանները սրանով կանաչ ճանապարհ բացեցին ընտրակեղծիք իրագործողների համար:
Այս գործողությունները կատարվում էին ոստիկանության Արմավիրի վարչության պետ Տիգրան Եսայանի անմիջական հրահանգներով:
Իսկ Անուշավան Ալեքսանյանին 72 ժամ անազատության մեջ պահելուց հետո մեղադրանք առաջադրվեց ՀՀ Քրեական օրենսգրքի 131 հոդվածի հատկանիշներով: