«Հրապարակ» թերթը գրում է. «Ավտոմեքենաների պետհամարանիշների դիզայնին զուգահեռ, փոխվել են նաև մոտոցիկլետների ու կցորդների պետհամարանիշների կառուցվածքն ու դիզայնը։
«Օդի հանդիպակաց ճնշման արդյունքում բավականին խոչընդոտներ էին առաջանում, նախկինում նաև քաղաքացիներ, հասարակական կազմակերպություններ դիմել էին մեզ այս հարցով, և մենք, հաշվի առնելով հասարակական կարծիքներն ու նաև միջազգային փորձի ուսումնասիրման արդյունքում բերել ենք էդ համարանիշները միջազգային ստանդարտների, որպեսզի լինեն ավելի ընթեռնելի, համարանիշի չափերը՝ ավելի հարմար օգտագործման համար»,-ասաց Ճանպարհային ոստիկանության պետի տեղակալ Արթուր Տոնոյանը՝ ավելացնելով, որ այս ամենի արդյունքում մոտոցիկլետների համարանիշների վահանակի չափերը փոքրացվել են, իսկ կցորդների համար էլ նախատեսվել են նաև ոչ միայն քառակուսի, այլև երկար՝ ստանդարտ տեսքի վահանակով համարանիշներ։
Նկատենք, որ քառակուսի համարանիշներ տեղադրվում են նաև մի շարք մարդատար ավտոմեքենաների վրա. դրանք հիմնականում ամերիկյան ստանդարտներով թողարկված մեքենաներն են, նաև ճապոնական շուկայից ներմուծված մի շարք մոդելներ։ Այս առումով Արթուր Տոնոյանն ասաց, որ լինում են ցանկալի, հերթական և մեծ չափորոշիչին համապատասխան համարանիշներ։ Հերթական համարանիշների մեջ իրենք նախատեսել են երկու սովորական երկար, մեկ երկար, մեկ կարճ և երկու կարճ։
Պետհամարանիշների օգտագործման համատեքստում ՃՈ պետի տեղակալի հետ զրուցեցինք նաև օրինախախտման դեպքերի մասին, մասնավորապես, որ վերջերս «մոդա» է ընկել ԱԺ-ի համարներն ապօրինի կրկնօրինակել և նույն համարը փակցնել մի քանի մեքենաների վրա ու «անձեռնմխելի» ֆռֆռալ։ Ահավասիկ Դավիթ Լոքյանի որդու՝ Սերգեյ Լոքյանի օրինակը, ով իրեն ԱԺ-ից «նվեր» մնացած 037 oo 01 պետհամարանիշը փակցրել էր միաժամանակ մի քանի մեքենաների վրա։ Լոքյանին, ինչպես տեղեկացանք, օրեր առաջ զրկել են այդ համարանիշի տնօրինման իրավունքից։
Մանրամասները՝ թերթի այսօրվա համարում
