Ադրբեջանական Trend լրատվական գործակալության փոխանցմամբ՝ Ռուսաստանն Ադրբեջանում դադարեցրել է Գաբալայի ռադիոտեղորոշիչ կայանի (ՌՏԿ) գործունեությունը: Այս մասին այսօր հայտարարել է Ադրբեջանի ԱԳՆ-ն:
Վերջինիս տարածած հաղորդագրության մեջ նշված է, որ քանի որ 2012 թվականի դեկտեմբերի 9-ին լրացել է «Ռուսաստանի ու Ադրբեջանի կառավարությունների միջև Գաբալայի ՌՏԿ-ի կարգավիճակի, շահագործման սկզբունքների ու պայմանների վերաբերյալ» համաձայնագրի ժամկետը, ռուսական կողմը նոտա է հղել՝ այս տարվա դեկտեմբերի 10-ից Գաբալայի ՌՏԿ-ի շահագործման դադարեցման մասին:
Հաղորդագրությունում նաև նշված է, որ Գաբալայի ՌՏԿ-ի վերաբերյալ Ադրբեջանի ու Ռուսաստանի միջև անցկացվել են ինտենսիվ բանակցություններ, Ադրբեջանը բանակցությունների ժամանակ ցուցաբերել է ռուսական կողմի հետ համագործակցությունը շարունակելու պատրաստակամություն՝ նպատակ ունենալով երկարաձգել Գաբալայի ՌՏԿ-ի շահագործման ժամկետը, սակայն բանակցությունների ժամանակ կողմերին չի հաջողվել համաձայնության գալ տվյալ կայանի վարձավճարի շուրջ:
Հիշեցնենք, որ Ռուսաստանն այդ կայանը 10 տարով վարձակալել էր 2002 թվականի դեկտեմբերին: Եվ քանի որ սպառվում էր դրա վարձակալության ժամկետը, վերջինս մտադիր էր պայմանագիրը երկարաձգել մինչև 2025 թվականը: Սակայն Ադրբեջանը պահանջել էր 43 անգամ ավելացնել տարեկան վարձավճարի չափը՝ 7 միլիոն դոլարից հասցնելով մինչև 300 միլիոն դոլարի:
Գաբալայի ՌՏԿ-ի գործունեության հեռահարությունը կազմում է 6000-6500 կիլոմետր, նրա տեսադաշտում են գտնվում Թուրքիան, Իրաքը, Իրանը, Հնդկաստանը և Մերձավոր Արևելքի բոլոր երկրները: Ավելի վաղ ադրբեջանական կողմը Ռուսաստանին սպառնացել էր Գաբալայի ՌՏԿ-ից հրաժարվելու դեպքում այն հանձնել ԱՄՆ-ին կամ Թուրքիային: