Լիբանանյան «Հզբոլլահ» շարժման պարագլուխ Սեյիդ Հասան Նասրալան համարում է, որ պայքարը «Իրաքի և Լևանտի իսլամական պետություն» (ԻԼԻՊ) խմբակցության դեմ, որն այժմ կոչվում է «Իսլամական պետություն» (ԻՊ), իրագործելի խնդիր է և ավելի հասարակ, քան պայքարը Իսրայելի դեմ: Այս մասին հաղորդում է RIA Novosti–ն։
«ԻԼԻՊ-ը և նրանք, ովքեր կանգնած են նրա թիկունքում, հեշտությամբ կարող են տապալվել։ Դա բացարձակապես անիրական խնդիր չէ։ Ճակատամարտը Իսրայելի դեմ ավելի դժվար է, քան ԻԼԻՊ-ի»,- ուրբաթ օրը իր հեռուստաուղերձում հայտարարել է Նասրալան՝ ի պատիվ 2006թ. «հուլիսյան պատերազմում» Իսրայելի նկատմամբ տարած հաղթանակի։
Նասրալան նշել է, որ ԻԼԻՊ-ը ապագա չունի Մերձավոր Արևելքում։ Բայց դա չի նշանակում, թե պետք է թուլանալ և ոչինչ չանել։ Նրա խոսքերով՝ ԻԼԻՊ-ը ապագա չի ունենա, եթե իրաքյան, սիրիական և լիբանանյան ժողովուրդները միավորվեն և իրենց երկրներում պայքարեն ծայրահեղականների դեմ։ Սակայն ոչինչ չի ստացվի, եթե «մենք գլուխներս ավազի մեջ թաքցնենք»՝ ասել է «Հզբոլլահի» առաջնորդը։
