Վրաստանի վարչապետ Իրակլի Ղաբրիաշվիլին, մեկնաբանելով երկրի նախկին նախագահ Միխեիլ Սաակաշվիլիին առաջադրված բյուջետային միջոցների վատնումի մասին մեղադրանքը, հայտարարել է, որ Վրաստանում ավարտվել է «անպատժելիության» դարաշրջանը, գրում է apsny.ge-ն:
Դատախազությունը օգոստոսի 14-ին Սաակաշվիլիի նկատմամբ հետախուզում է հայտարարել:
Օգոստոսի 14-ին «Ռուսթավի-2» հեռուստաալիքին Նյու Յորքից տված հարցազրույցում Սաակաշվիլին հայտարարել է, որ իր նկատմամբ քրեական հետապնդումը և հետախուզում հայտարարելը նպատակ ունեն խոչընդոտելու իր մուտքը Վրաստան, որպեսզի ինքը չկարողանա ակտիվորեն մասնակցել երկրի քաղաքական կյանքին:
Նա կտրականապես հերքել է պետական միջոցները յուրացնելու հետ կապված մեղադրանքները և հայտարարել է, որ բոլոր ծախսերը երկրի շահերից ելնելով են արվել:
Վարչապետ Ղարիբաշվիլին հայտարարել է, թե ծախսերն արդարացնելու՝ «Ազգային շարժման» և Միխեիլ Սաակաշվիլիի փորձերը «խայտառակություն են»: «Նա (Սաակաշվիլին) շատ հուզված էր, և ես հիշեցի պատերազմի ժամանակվա կադրերը, երբ նա շատ վախեցած էր, և կարծես կրկնվում են մեր արդեն տեսած կադրերը»,- օգոստոսի 15-ին լրագրողներին հայտարարել է Ղարիբաշվիլին:
«Եթե որևէ երկրում որևէ պետության ղեկավար կարծում է, թե դա նորմալ է, ապա մենք չպետք է խոսենք ժողովրդավարության մասին: Դա տիպիկ բռնակալի հայտարարություն է, թե ինչպես կարելի է, որ մերսողի ծառայությունները և այնտեղ արված միլիոնների ծախսերը որպես նորմա ընդունվեն: Դա բացառվում է: Ես ևս մեկ անգամ ուզում եմ հայտարարել, որ Վրաստանում ավարտվել է անպատժելիության դարաշրջանը, և բոլոր քաղաքացիները օրենքի առջև հավասար կլինեն՝ թե նախագահ, թե վարչապետ և թե խորհրդարանի նախագահ կամ ցանկացած այլ պաշտոնյա կամ նախարար», -հայտարարել է Ղարիբաշվիլին:
Այն հարցին, արդյոք Վրաստանի իշխանությունները Սաակաշվիլուն կներառե՞ն Ինտերպոլի ցուցակի մեջ, վարչապետը պատասխանել է, որ իրավական գործընթացների վերաբերյալ ինքը տեղեկություններ չունի:
«Սպասեք: Դատախազությունն ամեն ինչ պրոֆեսիոնալ է անում, արվում է օրենքով նախատեսված ամեն բան»,- ավելացրել է Ղարիբաշվիլին:
Միխեիլ Սաակաշվիլիի փաստաբանը հայտարարել է, որ նույնիսկ այն դեպքում, եթե Վրաստանի իշխանությունները հասնեն Սաակաշվիլու արտաքսմանը, նրանց մոտ այնպես չի ստացվի, ինչպես եղել է պաշտպանության նախկին նախարար Դավիթ Կեզերաշվիլիի դեպքում, երբ Ֆրանսիայի դատարանը բավարարել էր նրա արտաքսման վերաբերյալ Վրաստանի խնդրանքը: