Այսօր Մաշտոցի պուրակում իրականացվեց հանրային քննարկում և ստորագրահավաք, որի նպատակն է աջակցել ծայրահեղ իսլամիստական և ահաբեկչական խմբավորումների գործողությունների արդյունքում տուժած էթնիկ փոքրամասնություններին, մասնավորապես եզդիներին:
Մինչ այս մի շարք հասարակական կազմակերպություններ և քաղաքացիներ բաց նամակ էին հղել արտաքին գործերի նախարար Էդվարդ Նալբանդյանին և ՄԱԿ-ում ՀՀ մշտական ներկայացուցչության դեսպան Զոհրաբ Մնացականյանին` կոչ անելով ՄԱԿ-ի Գլխավոր ասամբլեայում բարձրաձայնել Իրաքում տեղի ունեցող իրադարձությունների մասին, քանի որ Իրաքում ծայրահեղ իսլամիստական և ահաբեկչական խմբավորումների գործողությունների հետևանքով ստեղծվել է հումանիտար աղետի իրավիճակ, որի զոհերի և տուժածների մեծ մասը իրաքաբնակ էթնիկ և կրոնական փոքրամասնություններն են, նրանց թվում և՝ եզդիները:
Նամակում, սակայն, ստորագրություններ չեն եղել, քանի որ անուն-ազգանունները գրվել են Facebook-ի միջոցով, ուստի ԱԳՆ-ին նամակը փոխանցվել է միայն անուն-ազգանուններով: «ԱԳՆ-ից պատասխանել են, որ պետք է լինեն ստորագրություններ: Պահանջում ենք, որպեսզի Հայաստանը ՄԱԿ-ում բարձրաձայնի այս հարցի մասին, քանի որ Հայաստանի արտաքին գործերի նախարարությունը անտարբերության է մատնում այս խնդիրը, իսկ մեզ համար այն շատ կարևոր է, քանի որ Հայաստանն այն եզակի երկիրն է, որը կարող է խոսափող լինել եզդիների համար, բայց Հայաստանը այս պահին տեսնում ենք, որ պատրաստակամ չէ, գոնե ԱԳՆ-ի մակարդակով»,- «Առաջին լրատվական»-ի հետ զրույցում ասաց «Սինջար եզդիների ազգային միավորում» ՀԿ խորհրդի ղեկավար Բորիս Մուրազինը:
Հասարակական կառույցների ներկայացուցիչները նկատեցին, որ Հայաստանը՝ որպես ցեղասպանություն վերապրած երկիր, ավելի քան լավ պետք է հասկանա՝ այս պահին ազգի խնդիրն է դրված:
«Հայաստանի կառավարությունը խոստացել է 50 հազար ամերիկյան դոլար, հայտարարությունը հենց իրենք են տարածել, բայց, ցավոք, մինչև հիմա գումարը չի փոխանցվել, խոստացել են կառավարության վաղվա նիստից հետո այդ հարցի մասին խոսել, սակայն այդտեղ էլ տեղափոխման խնդիր կա, այսինքն՝ տեղափոխելու պատասխանատվություն չեն վերցնում: Փորձում ենք ՄԱԿ-ին դիմել, տեսնենք՝ ինչպես կարող ենք ուղարկել»,- «Առաջին լրատվական»ի հետ զրույցում ասաց Հայաստանի եզդիների ազգային կոմիտեի փոխնախագահ Սաշիկ Սուլթանյանը՝ հավելելով, որ Հյուսիսային Իրաքում իրավիճակն առավել է շիկանում, ժամանակն աշխատում է իսլամիստների օգտին, ամեն առավոտ չորս գյուղի նրանք վերջնագիր են ներկայացնում, որպեսզի եզդիները իրենց կրոնից հրաժարվեն, այլապես երեկոյան կսպանեն, և երեկոյան տեղի է ունենում զանգվածային կոտորածը:
Համաձայն ՄԱԿ-ի հուլիսի 9-ի տեղեկատվության` ավելի քան 850.000 մարդ է Իրաքում տեղահանվել վերջին մեկ ամսվա ընթացքում, որոնցից 200.000-ը՝ միայն վերջին մեկ շաբաթում:
Հայաստանի եզդիական համայնքին երեկ աջակցելու էին եկել նաև հայ քաղաքացիները և մի շարք ՀԿ-ների ներկայացուցիչներ, որոնք ևս ընդգծում էին, որ մեր պետությունը պարտավոր է միջոցներ ձեռնարկել` առնվազն ՄԱԿ-ի Գլխավոր ասամբլեայում հորդորելով Անվտանգության խորհրդի անդամ պետություններին ընդունել մարդասիրական ռազմական միջամտություն լիազորելու բանաձև:
«Շվեյցարիայում Հայաստանի դեսպան Շառլ Ազնավուրը եզդիների և քրիստոնյաների խնդրով դիմել է Ֆրանսիայի իշխանություններին, իսկ ինչն է խանգարում Հայաստանի արտաքին գործերի նախարարությանը՝ այս հարցերը միջազգային կառույցներում բարձրացնելու: Չէ՞ որ եզդիները, ասորիները և քրդերը նաև ՀՀ քաղաքացիներ են, որոնց ազգային շահերը կարող է բարձրաձայնել, բայց ինչը չի անում»,- ասաց «Քաղաքացիական զարթոնք» ՀԿ նախագահ Տիրայր Մուրադյանը:
