Որքա՞ն ավտոմեքենա է Հայաստանում բենզինով աշխատող շարժիչից անցում կատարել գազի բալոնի: Այս հարցը պարզելու համար «Առաջին լրատվական»-ը դիմեց տրանսպորտի և կապի նախարարություն, որտեղից ստացված պատասխանը բավականին վիճելի է. ըստ նախարարության՝ «Հայաստանի Հանրապետությունում շահագործվող տրանսպորտային միջոցների մոտ 30%-ը շահագործվում է սեղմված բնական գազով, 4%-ը՝ դիզելային վառելիքով»։
Այսինքն` ստացվում է, որ գազի բալոնների շուրջ ստեղծված այսքան աժիոտաժից հետո մեքենաների 66%-ը դեռ բենզինով է աշխատում: Այս ցուցանիշն այնքան էլ հավանական չի թվում, առավել ևս, որ փորձագետների գնահատականով, ՀՀ-ում մեքենաների կեսից ավելին արդեն գազ են օգտագործում: ՊԵԿ ներմուծման տվյալները փաստում են, որ բենզինի պահանջարկը ՀՀ-ում նվազում է. 2011թ. առաջին 9 ամիսների 263 հազար տոննայի փոխարեն 2012 թ. նույն ժամանակահատվածում ներկրվել է 249.9 հազար տոննա նավթամթերք, կամ 5.2%-ով պակաս:
Նախարարությունից նաև նշեցին, որ մշակվել է օրենսդրական նախաձեռնություն, որի ընդունման դեպքում՝ գազով շահագործվող տրանսպորտային միջոցները կարող են շահագործվել միայն գազաբալոնի հաջորդ վկայագրման ժամկետը նշող կտրոնի առկայության դեպքում։ Ըստ գերատեսչության պատասխանատուների՝ նշյալ փոփոխությունը կբարձրացնի գազով շահագործվող տրանսպորտային միջոցների անվտանգությունը և միաժամանակ կապահովի գազով շահագործվող տրանսպորտային միջոցների ճշգրիտ հաշվառումը։
Սակայն նախարարությունից չեն նշել, թե այդ կտրոնն ի՞նչ կարժենա և բյուջեն դրանից ինչքանո՞վ կավելանա: