Ռոթվեյլերի 6-ամյա մետիս շունը՝ Բլեսը, տխուր շուն է, որն ապրում է Լոնդոնի կենդանիների կացարաններից մեկում: Շունը ոչ մի կերպ չի կարողանում տեր գտնել, ապաստանի աշխատակիցներն էլ արդեն նրան լավ տիրոջ հանձնելու հույս չունեն: Ոչ ոք չի ուզում տանել նրան, քանի որ նա չափազանց դեպրեսիվ տեսք ունի:
Ապաստանի աշխատակիցները Բլեսին անվանել են Մեծ Բրիտանիայի ամենատխուր շուն, հայտնում է Mirror-ը:
Մոտ կես տարի առաջ Battersea Dogs and Cats Home ապաստանի աշխատակիցները Բլեսին գտել են Լոնդոնի փողոցներից մեկում: Նրանք կարծել են, որ գեղեցիկ ու ընկերասեր շանը շուտով «կորդեգրեն», բայց՝ ոչ. շատերը նրան տանելուց հրաժարվելը բացատրել են նրանով, որ շունը չափազանց տխուր է: Եվ իսկապես, շունը չափազանց տխուր հայացք և ցած կախված ականջներ ունի:
Սակայն Battersea Dogs and Cats Home-ի աշխատակիցներն ասում են, որ շունն իրականում շատ բարի ու խելացի է: Նրանք Բլեսի մասին պատմել են լրագրողներին, որպեսզի նրանք օգնեն շան համար տեր գտնել:
