ԵԱՀԿ Մինսկի խմբի համանախագահողների հայտարարությունից Ղարաբաղյան հակամարտության կարգավորման գործընթացում բեկում ակնկալելը վաղաժամ է: «Առաջին լրատվական»-ի հետ զրույցում այս մասին ասաց ԼՂՀ նախագահի մամլո քարտուղար Դավիթ Բաբայանը՝ անդրադառնալով ԵԱՀԿ Մինսկի խմբի համանախագահող երկրների պատվիրակությունների ղեկավարների` երեկ Դուբլինում ընթացող ԵԱՀԿ անդամ երկրների արտգործնախարարների խորհրդի 19-րդ նստաշրջանում տարածված համատեղ հայտարարությանը:
Դավիթ Բաբայանը նշեց, որ հայտարարությունից հետո կտրուկ գործողությունների, բեկումների սպասելը դեռևս վաղաժամ է, քանի որ Ադրբեջանի կողմից վարվող քաղաքականությունը լավատեսության տեղ չի թողնում: Ուստի, նրա խոսքով, եթե չկա այլընտրանք՝ Ղարաբաղյան հարցի խաղաղ կարգավորման բանակցությունների առաջընթացի հնարավորություն, կարևոր է հայտարարությունն այն առումով, որ համանախագահողները հորդորում են պահպանել ստատուս քվոն:
Դավիթ Բաբայանի գնահատմամբ՝ բոլոր այդ հայտարարություններն ուղղված են ստատուս քվոյին: «Ողջունելի է, որ համանախագահողները նման հայտարարություն են ընդունել: Սա նշանակում է, որ Ռուսաստանը, Եվրոպան՝ Ֆրանսիան, ԱՄՆ-ը չեն ցանկանում, որ պատերազմ լինի, և որ դա որևէ մեկին ձեռնտու չէ, հատկապես հիմա, երբ Ադրբեջանում ֆաշիստական մթնոլորտ է, որտեղ Սաֆարով են հերոսացնում»,- ասաց Դավիթ Բաբայանը:
Մանրամասնորեն անդրադառնալով հայտարարության բովանդակությանը՝ ԼՂՀ նախագահի մամլո քարտուղարն ասաց, որ կարևոր էր հայտարարության մեջ հղումը Հելսինկյան եզրափակիչ ակտի հիմնական սկզբունքներին, որում, նրա հավաստիացմամբ, շեշտված է ուժի կամ ուժի սպառնալիքի չկիրառման, տարածքային ամբողջականության ու ժողովուրդների ինքնորոշման իրավունքի պահպանման անհրաժեշտությունը: Ըստ Դ. Բաբայանի՝ երբ հղում է կատարվում այս ակտին, նշանակում է, որ ադրբեջանական քարոզչությունը իրենց կողմից պատկերացված սկզբունքներին համապատասխան չի շարժվում: «Սա ևս մեկ անգամ ցույց է տալիս, որ որևէ միջնորդ երկիր անհավասարություն չի դնում երկու երկրների միջև, և շեշտում է, որ ստատուս քվոն պետք է պահպանվի»,- եզրափակեց իր խոսքը Դավիթ Բաբայանը:
Հիշեցնենք, որ ԵԱՀԿ Մինսկի խմբի համանախագահող երկրների պատվիրակությունների ղեկավարները երեկ Դուբլինում ընթացող ԵԱՀԿ անդամ երկրների արտգործնախարարների խորհրդի 19-րդ նստաշրջանում համատեղ հայտարարություն են տարածել՝ կապված Ղարաբաղյան հակամարտության կարգավորման հետ: Համանախագահողները հակամարտող կողմերին կոչ են արել քաղաքական կամք ցուցաբերել՝ Ղարաբաղյան հակամարտության խաղաղ կարգավորմանը հասնելու համար: «Հենվելով 2011 թվականին Դովիլում նախագահների արած հայտարարության վրա՝ մենք նորից կողմերին կոչ ենք անում վճռական քայլեր ձեռնարկել՝ խաղաղ կարգավորմանը հասնելու համար: Մենք ցավում ենք, որ չեն կատարվել խաղաղության գործընթացում արագ առաջընթացի ակնկալիքները, ինչը բխում էր 2012 թվականի հունվարի 23-ին Սոչիում Հայաստանի, Ադրբեջանի և Ռուսաստանի նախագահների համատեղ հայտարարությունից»,- նշել են համանախագահողները: