Եգիպտոսի նախագահ Աբդել Ֆաթահ Ալ-Սիսին երեքշաբթի առաջին պաշտոնական այցով ժամանել է Ռուսաստան: Այս մասին հայտնում է Ria Novosti-ն:
Սոչիի օդանավակայանում Ալ-Սիսիին դիմավորել է ՌԴ արտգործնախարար Սերգեյ Լավրովը: Դիմավորման արարողությունից հետո Եգիպտոսի նախագահն ուղևորվել է լեռնային օլիմպիական կլաստեր, որտեղ կհանդիպի ՌԴ նախագահ Վլադիմիր Պուտինի հետ:
Սպասվում է, որ երկու երկրների նախագահների բանակցությունների կենտրոնում կլինեն տնտեսության ոլորտում համատեղ ծրագրերի համալիրի իրագործումը, ներառյալ՝ Եգիպտոսի և Մաքսային միության միջև ազատ առևտրի գոտու ստեղծումը, ռազմա-տեխնիկական համագործակցությունը, պաղեստինյան Գազայի հատվածում և մերձավորարևելյան տարածաշրջանում հակամարտությունների կարգավորումը:
Սպասվող հանդիպումը առաջինը կլինի Ալ-Սիսիի Եգիպտոսի նախագահ ընտրվելուց հետո: