Իտալիան եվրոպացի գործընկերների հետ դիտարկում է Իրաքում իրավիճակի կարգավորման համար ավելի արդյունավետ գործողությունների հնարավորությունը, սակայն ռազմական միջամտության մասին խոսք չկա: Այս մասին ռադիոհարցազրույցում հայտարարել է Իտալիայի արտգործնախարար Ֆեդերիկա Մոգերինին՝ փոխանցում է ITAR-TASS-ը:
«Մենք չենք դիտարկում մեր ռազմական միջամտության հնարավորությունը, սակայն չենք բացառում քրդական կառավարությանն աջակցության ցուցաբերումը, այդ թվում՝ ռազմական»,- հայտարարել է նա:
Իտալացի նախարարը հայտնել է, որ պաշտոնական նամակ է ուղարկել արտաքին և անվտանգության քաղաքականության հարցերով ԵՄ գերագույն ներկայացուցիչ Քեթրին Էշթոնին՝ ԵՄ արտգործնախարարների խորհրդի հանդիպում գումարելու առաջարկով՝ քննարկելու իրավիճակն Իրաքում, Գազայում և Լիբիայում:
«Տարբեր երկրներ ձեռնարկում են իրավիճակի վրա ազդելու փորձեր, սակայն անհրաժեշտ է միասնական արդյունավետ եվրոպական նախաձեռնություն»,- կարծում է Մոգերինին:
